"Asnjë parti në Kosovë nuk është e pastër nga gabimet"

“Asnjë parti në Kosovë nuk është e pastër nga gabimet”

Kryetari i PDK-së, Kadri Veseli, në një konferencë për media ka prezantuar Paktin Kundër Korrupsionit duke i ftuar të gjithë liderët e partive politike ta nënshkruajnë atë.

Veseli ka thënë se “nuk është sekret që korrupsioni ka arritur nivele të larta në vendin tonë dhe po e dëmton shumë atë por lufta kundër korrupsionit është çështja më kritike në agjendën  e tij”.

Sipas tij, ky fenomen po i dëmton edhe marrëdhëniet me miqtë aleatë.

Madje edhe partnerët tanë të rëndësishëm, sikurse Shtetet e Bashkuara të Amerikës, kanë shprehur shqetësimin për korrupsionin dhe nepotizmin në vendin tonë. Korrupsioni është një e keqe dhe madje dëmton marrëdhëniet tona me jashtë. Gjithçka fillon me luftën kundër korrupsionit. Vetëm nëse zhvillojmë një luftë pa kompromis kundër korrupsionit, ne mund të ndërtojmë një të ardhme për të rinjtë këtu”, theksoi Veseli.

Veseli po ashtu theksoi se shumë të rinj po largohen nga vendi për shkak të mungesës së mundësive të barabarta; një rezultat ky i drejtpërdrejtë i korrupsionit dhe nepotizmit.

Asnjë parti në Kosovë nuk është e pastër nga gabimet dhe nuk mendoj se publiku pret që ne të bëjmë një lojë fajësie. Publiku pret që ne të bëjmë ndryshime dhe të krijojmë një realitet të ri dhe kjo është ajo që duhet të bëjmë. Javët e fundit kam folur për luftën kundër korrupsionit, listën e pastër që do të përfaqësojmë dhe qeverinë e ardhshme që unë do të drejtoj. Listë pa aktakuza dhe qeveri pa aktakuza. Unë gjithashtu kam marrë disa vendime të brendshme lidhur me partinë time, siç është vendimi për të larguar nga postet zyrtare të gjithë personat që kanë patur aktakuza për nepotizëm dhe korrupsion”, shtoi Veseli.

Në fund, kryetari i PDK-së pasi ka nënshkruar këtë pakt kundër korrupsionit, ka thënë se do t’ua dërgoj zyrtarisht secilit kryetar partie politike që garon në këto zgjedhje për ta nënshkruar të njëjtën, në mënyrë që lufta kundër korrupsionit dhe nepotizmit të mos mbetet vetëm në letër, por të kthehet në vepra./21Media