Ambasadorja gjermane tha se politikanët duhet t'i zgjidhin çështjet më shumë përgjegjësi

Ambasadorja gjermane tha se politikanët duhet t’i zgjidhin çështjet më shumë përgjegjësi

Ambasadorja gjermane në Kosovë, Angelika Viets, ka thënë se ndërkombëtarët nuk dëshirojnë të përfshihen në formimin e Qeverisë së re. Por, tha se vetëm dëshirojnë t’ua kujtojnë politikanëve kosovarë që këtë çështje ta zgjidhin me përgjegjësi të madhe, pasi vendi ka probleme shumë të mëdha, të cilat njëherësh janë edhe sfida të mëdha.

Këto komente Viets i ka bërë një intervistë për “Zërin”, duke shtuar se kriter për liberalizimin e vizave me BE-në përpos Demarkacionit është edhe luftimi i krimit të organizuar dhe i korrupsionit. Sipas saj, në kuadër të luftimit të krimit të organizuar dhe të korrupsionit janë edhe hapa të tjerë, të cilët duhet të ndërmerren e ndër ta është edhe konfiskimi i pasurisë së fituar në mënyrë të paligjshme.

Viets ka folur edhe për përfshirjen e presidentit Thaçi në dialog me Serbinë, me ç’rast ka theksuar se secili format i dialogut i cili çon në normalizimin e marrëdhënieve në mes dy vendeve është i mirëseardhur, përderisa përfaqësuesit të cilët zhvillojnë këtë dialog kanë një mandat për ta bërë atë.

“Në këtë rast mendoj që presidenti ka një mandat për të zhvilluar një dialog në kuptim të normalizimit të marrëdhënieve”, ka potencuar Viets.