Votohet Projektligji për paga

Ulen koeficientët nga 12 në 10

Komisioni për Administratë Publike miratoi amandamentet e projektligjit për paga për sektorin publik, ku miratoi edhe uljen e koeficienteve nga 12 sa ishte, në 10.

Deputetët votuan veç e veç amandamentet e këtij projektligji, me ç’rast dërguan në Kuvend amandamentin për Televizionin Publik të Kosovës, ndonëse nuk i pati votat. Me katër vota për, katër kundër dhe dy abstenime ky ligj u procedua në seancë.

Kryetari i këtij komisioni, Nait Hasani tha se të gjitha agjencive të cilat financohen nga shteti duhet t’u përcaktohet pragu i pagave.

E këtu vëmendje të madhe mori televizioni publik. “Në të ardhmen ne kemi kërkuar që me projektligjin e ri RTK të përcaktojë vet pagat e veta. Ne vetëm mund të përcaktojmë sa mund të jetë rroga minimale dhe maksimale. Nëse financimi kalon direkt nga qytetarët ata i përcaktojnë pagat vet, por nëse financohen nga shteti atëherë nuk mund të jetë ndryshe vetëm se 1:7”, tha ai.

Xhvahire Izmaku deklaroi se në këtë mënyrë komisioni ka thyer konceptin e shtetit për media të lira. “Kështu, ne kemi me dalë njerëz total të paditur”, u shpreh ajo.

Kurse, Rasim Selmanaj tha se televizoni publik duhet të hiqet nga projektligji për pagat në sektorin publik. “Mendoj se RTK duhet të hiqet nga projektligji për pagat në sektorin publik dhe mendoj se duhet t’i përcaktohen pagat. Ne këtë punë mund ta rregullojmë këtë me ligjin e RTK-së. Ta heqim këtë nga këtu, mos të lëmë këso hapësira”, u shpreh ai.

Kryetari i komisionit, Nait Hasani tha se ka kërkesë nga kryetari i Kuvendit, Kadri Veseli, që të ketë paga të përhershme për disa pozita të caktuara pas përfundimit të mandatit në pozitën përkatëse. “Kam kërkesë nga kryetari i Kuvendit që për kryeparlamentarin, kryeministrin, për kryeprokurorin e shtetit, prokurorin e gjykatës supreme dhe prokurorin e gjykatës kushtetuese, të jetë një pagë e përhershme me afat të kufizuar për 5 vjet”, tha ai.

Kohëve të fundit në Kosovë punëtorë të sektoreve të ndryshme publike janë në grevë pikërisht për shkak të koeficientit të artë në disa kategori dhe të ulët në kategori tjera.  Kujtojmë që sektori i arsimit ka hyrë sot në javën e tretë të grevës, ku po kërkojnë rritje të koeficientit. Për arsye të njëjtë, grevë kanë mbajtur edhe kirurgët.

Back to top button