Takohen Vuçiq dhe Palmer

Takohen Vuçiq dhe Palmer

Presidenti i Serbisë, Aleksandar Vuçiq dhe emisari special i SHBA-së për Ballkanin, Matthew Palmer biseduan sy më sy sot në Beograd. Pas takimit, Vuçiq tha se bisedimet ishin të hapura, të sinqerta dhe se ai është i kënaqur me përmbajtjen e bisedave.

“Ne kemi shqyrtuar të gjitha çështje tona kontestuese, të gjitha ndryshimet midis nesh, dhe unë do të thosha që ne jemi të vendosur të gjejmë zgjidhje në të ardhmen që do të nënkuptonin marrëdhënie më të mira mes vendit tonë dhe SHBA-së. Do të thosha që ishte gjithashtu një qasje konstruktive për t’u rikthyer sa më shpejt në dialog me Prishtinën”, tha ai.

Vuçiq pranoi se pikëpamjet e SHBA dhe Serbisë për Kosovën janë shumë të ndryshme, gjë që nuk është sekrete.

“SHBA e njohën Kosovën, Serbia ka një këndvështrim tjetër, por unë falënderoj  Palmer që ishte i gatshëm të dëgjojë ato që kemi për të thënë sot dhe më herët”, tha Vuçiq.

Duke iu përgjigjur pyetjeve të gazetarëve, Vuçiq tha se Serbia nuk do të hyjë në konflikt me SHBA.

“Ne nuk do të hyjmë në konflikte me Amerikën. As nuk më bie ndërmend të hyjmë në konflikt me fuqinë më të madhe”, u shpreh ai.

Vuçiq shtoi se të gjitha problemet do të zgjidheshin në nivelin dypalësh, duke mbrojtur interesat e tyre.

“Palmer më tha atë që nuk i pëlqen në lidhje me politikën serbe, ai ma tha këtë dhe unë iu përgjigja”, tha Vuçiq, duke shtuar se ai priste që së shpejti të krijohen kushte për vazhdimin e dialogut Beograd-Prishtinë dhe se Serbia dëshiron që ky dialog të jetë serioz dhe të çojë drejt një zgjidhje.

“Serbia është e gatshme për një kompromis, por kurrë nuk është për shkatërrimin e vet”, tha presidenti i Serbisë dhe shtoi se pohimet se ndaj Beogradit zyrtar duhet të ushtrohet presion për të bërë diçka që nuk është në interesin e saj- janë të pamundura.

Ndërsa, Palmer tha se SHBA-ja do një perspektivë evropiane për Ballkanin Perëndimor dhe tha se do të punojë për t’i bindur udhëheqësit e BE-së që ta bëjnë këtë përpara samitit të Zagrebit.