Ymeri: Vuçiq vazhdon të synojë të bëhet kopje e Millosheviqit
Ymeri sugjeron Vuçiqin të merret me dialogun për ta trajtuar çështjen e minoriteteve në Serbi
Nënkryetari dhe deputeti i Partisë Socialdemokrate, Visar Ymeri sot ka thënë se presidenti serb, Aleksandar Vuçiq po vazhdon të bëhet kopje e Sllobodan Millosheviqit. Ymeri e sugjeroi Vuçiqin që të mos e kopjojë Milloshoviqin por, të vazhdojë dialogun për ta trajtuar çështjen e minoriteteve në Serbi.
“Presidenti i Serbisë, Aleksandër Vuçiqi vazhdon të synojë të bëhet kopje e Sllobodan Millosheviqit. Pasi e glorifikoi atë si “lider të madh me qëllime të mira dhe rezultate të dobëta”, tash përdorë deklaratën e tij të Fushë-Kosovës në vitin 1987, ku Millosheviqi iu kishte thënë serbëve: “Askush nuk guxon t’ju rrahë””, ka shkruar deputeti, Visar Ymeri në llogarinë e tij “Facebook”.
Ymeri përmes këtij postimi ka thënë se të gjithë qytetarët e Kosovës pavarësisht emrit që mbajnë, gjuhës që flasin e religjionit që e besojnë, janë të barabartë e gëzojnë të drejta të barabarta.
“Republika e Kosovës nuk do të përndjekë por do të përfshijë e integrojë.”, u shpreh ai tutje.
Nënkryetari i PSD-së, Visar Ymeri tutje ka shkruar se Vuçiqi duhet të dëshmohet në demokratizimin dhe respektimin e të drejtave të njeriut dhe minoriteteve brenda Serbisë.
“Në vend se të synojë rezultate më të mira me idetë dhe veprimet e Sllobodan Millosheviqit duke keqpërdorur serbët e Kosovës, Aleksandër Vuçiqi le të dëshmohet në demokratizimin dhe respektimin e të drejtave të njeriut dhe minoriteteve brenda Republikës së Serbisë, duke filluar nga plotësimi i kritereve të Bashkimit Evropian për anëtarësimin e Serbisë (sidomos kapitujt 23 dhe 24) dhe jetësimin e tri marrëveshjeve që i ka firmosur Qeveria e Serbisë për Luginën e Preshevës, me prani ndërkombëtare”, ka shkruar Ymeri.
Ai shtoi se protestat nëpër Serbi dhe të gjitha të dhënat e organizatave të besueshme për të drejtat e njeriut po flasin mjaftueshëm për pushtetin e tij.
“Në vend se t’i vajtojë dhe t’i keqpërdorë serbët e Kosovës për interesat e pushtetit të tij në Beograd, Aleksandër Vuçiqi të vjen në tavolinën e negociatave në Bruksel, për ta trajtuar gjendjen dhe pozitën e të drejtave të njeriut dhe minoriteteve. Le ta krahasojmë aty pozitën kushtetuese dhe ligjore, si dhe gjendjen shoqërore, të minoriteteve në Serbi dhe në Kosovë. Të serbëve në Kosovë dhe të shqiptarëve në Serbi”, ka shkruar Ymeri./21Media