Miqësorja e radhës në basketboll

Miqësorja e radhës në basketboll

Do të zhvillohet miqësorja ndërmjet ndërmjet Shqipërisë dhe Kosovës në basketboll për nder të Ditës së Flamurit, më 28 Nëntor,

Ndeshja do të zhvillohet në Shkodër, të enjten nga ora 17:00 ndërsa Kosovën në këtë ndeshje do ta udhëheqë Bujar Loci, derisa ekipi do të përbëhet nga lojtarët e Superligës.

Shqipëria dhe Kosova gjithmonë kanë pasur bashkëpunim të mirë dhe kanë zhvilluar ndeshje miqësore për festat kombëtare dhe shtetërore.

Drejtori i Përfaqësueses së Kosovës, Granit Rugova, ka folur rreth kësaj ndeshje miqësore.

“Ne kemi pranuar me kënaqësi ftesën nga Federata Shqiptare e Basketbollit të zhvillojmë këtë ndeshje vëllazërore, ku rezultati është në plan të dytë. Ne gjithmonë kemi pasur bashkëpunim të mirë me Federatën Shqiptare dhe ky bashkëpunim do të thellohet edhe më shumë. Për shkak të orarit, ekipi i Kosovës do të përbëhet nga lojtarët e Superligës, derisa ndeshjen do ta udhëheqë trajneri Bujar Loci”, është shprehur Rugova për faqen zyrtare të FBK-së.

Ndërkohë, në pranverën e vitit të ardhshëm do të organizohet një turne në Kosovë, me katër skuadrat më të mira të Kosovës tek meshkujt dhe katër më të mirat të Shqipërisë, kurse në vjeshtën e ardhshme do të organizohet edhe një turne tjetër, me dy skuadrat më të mira të Kosovës dhe dy më të mirat nga Shqipëria.

Këto takime do ta thellojnë më shumë bashkëpunimin ndërmjet Federatës së Basketbollit të Kosovës dhe Federatës Shqiptare të Basketbollit./21Media