Ministri i Bujqësisë, Pylltarisë dhe Zhvillimit Rural, Besian Mustafa, deklaroi sot se ministria që ai drejton do të vazhdojë mbështetjen për bujqësinë, sidomos në sektorët të cilët janë më të prekur nga pandemia COVID-19.

Ai gjatë një takimi me kryetarin e Shoqatës së Përpunuesve të Mishit, Naser Rusinovci, tha se mbështetje e veçantë do të ketë sektori i përpunimit të mishit, në mënyrë që të tejkalohen sfidat dhe të vazhdohet me fuqizimin e punës së këtij sektori të rëndësishëm.

Mustafa ka theksuar se do të vazhdojë përkrahja e MBPZHR-së përmes programeve mbështetëse të subvencioneve dhe granteve.

Ndërsa, kryetari i Shoqatës së Përpunuesve të Mishit, Naser Rusinovci ka falënderuar ministrin për gatishmërinë dhe e ka njoftuar për situatën në të cilën ndodhet ky sektor.