Kualifikimet për në Kampionatin Botëror “Katar 2022” tashmë dihet se e kanë vendosur Kosovën dhe Spanjën në Grupin B dhe ballafaqimi i tyre i parë do të zhvillohet në fund të muajit Mars të vitit të ardhshëm.

Mediat spanjolle po i kushtojnë tashmë një vëmendje të veçantë lojtarëve te Kosovës që luajnë nëpër klubet e ndryshme evropiane.

Në artikullin e fundit të publikuar nga gazeta e njohur spanjolle “Marca”, i bëhet thirrje trajnerit Luis Enrique që të ketë kujdes të veçantë Valon Berishës dhe Arbër Zenelit.

“Luis Enrique dhe ekipi i tij tashmë duhet të analizojnë rivalët e Spanjës për t’u kualifikuar në Kupën e Botës “Katar 2022”, duke përfshirë ekipin e Kosovës”, shkruan “Marca”.

Valon Berisha, mesfushori i Reims, është një nga lojtarët më të njohur, por nuk duhet ta harrojmë as shokun e tij të skuadrës Arbër Zeneli, shkruhet më tutje në këtë medium.

Mesfushori kosovar nga “Stade Reims” shënoi një gol të bukur këtë të Dielë kundër Brest. Një gol i shkëlqyeshëm që duhet të analizohet mirë nga stafi i trajnëeit të ‘La Rojas’, përfundon artikulli në “Marca”.