Një person nga Gjilani ka ndërruar jetë sot në rrethana ende të panjohura në Qendrën e Studentëve në Prishtinë, e cila po shfrytëzohet si karantinë për shkak të pandemisë me koronavirus.

Mjeku specialist në Qendrën Emergjente, Blerim Hyseni, i cili ka bërë pranimin e tashmë të ndjerit në Emergjencë, tha për KP se lëndimet e pacientit kishin qenë shumë të rënda, ndërsa për shkaktarin e vdekjes do të pritet raporti nga ekspertiza e mjekut ligjor.

Në orën 17:30, në Qendrën emergjente është sjellë me urgjencë, pacienti një i ri 26-vjeçar, pa shenja jete. Sipas asaj që ne kemi vlerësuar, pacienti ka ndërruar jetë në vendin e ngjarjes, në bazë të lëndimeve që ka pasur lëndime të rënda, vdekjeprurëse. Në pranim ka qenë pacienti pa shenja jete, me gjakderdhje nga veshi, hunda dhe goja. Prej lëndimeve të dukshme që ne i kemi parë kanë qenë këto, mirëpo për shkaktarin definitivisht të vdekjes fjalën e ka ekspertiza e mjekut ligjor, për të cilën edhe kemi kërkuar ekspertizën”, tha Hyseni.

Sipas dëshmitarëve, 26-vjeçari ka ardhur dje nga Gjermania.