Inspektorati Shëndetësor i Ministrisë së Shëndetësisë me kërkesë të Policisë së Kosovës, sot  ka shkuar për të kryer  inspektim specifik në Institucionin Shëndetësor Privat “CT Scaner” në lagjen Ulpiana të Prishtinës, me themelues A.K.

Përmes një komunikate për media thuhet se për shkak se “institucioni në fjalë në momentin e paraqitjes së inspektorëve shëndetësor para hyrjes së tij ishte i mbyllur nga ana e Policisë së Kosovës, pas disa informacioneve të marra nga policia dhe banorët në afërsi të IPSh në fjalë, inspektorët shëndetësorë kanë shkuar në Klinikën Emergjente në QKUK ku ishte transferuar një pacient-fëmijë (T.H., 2013), i cili paraprakisht i ishte nënshtruar rreth orës 10:00, një ekzaminimi MRI (Rezonancë Magnetike) në IShP “CT Scaner”, të caktuar një ditë më herët. Për të bërë ekzaminimin, fëmija kishte shkuar i shoqëruar në këtë institucion privat nga të dy prindërit e tij”.

Sipas dyshimeve, për shkak të përkeqësimit të gjendjes shëndetësore gjatë ekzaminimit në IPSh “CT Scaner”, pacienti ishte transferuar në Klinikën Emergjente të QKUK-së, nga ekipi i Mjekësisë Urgjente të Prishtinës, shoqëruar nga një mjek specialist i Anesteziologjisë me Reanimacion i institucionit privat ku ishte kryer ekzaminimi, thuhet tutje në komunikatë.

Inspektorati Shëndetësor ka marrë deklaratat e mjekëve të ndërrimit në Klinikën Emergjente-QKUK, sipas të cilëve kur pacienti kishte arritur (i transferuar aty, ishte pa shenja jete dhe përkundër reanimimit kardio-pulmonor të ekipit të emergjencës, për rreth dy orë, nuk kishte mbijetuar.

Inspektorati Shëndetësor vazhdon hetimet rreth këtij rasti dhe së shpejti do të hartojë raportin përfundimtar rreth të gjeturave të inspektimit në këtë rast.

Zëdhënësja e policisë për rajonin e Prishtinës Flora Ahmeti, për portalin rtv21.tv tregoi se trupi i viktimës është dërguar për obduksion. /21Media