Ministri i Shëndetësisë, Armend Zemaj, ka kërkuar zbatimin strikt të masave antiCOVID-19, pasi që vetëm në këtë mënyrë mund të vijë deri te shmangia e një gjendje të jashtëzakonshme me të infektuar dhe të hospitalizuar.

Ai në një postim në Facebook ka shkruar se situata me pandemi në Kosovë është e njëjtë si në shtetet e rajonit, por kapacitetet spitalore nuk janë në situatën më të mirë, andaj përtej statistikave me të infektuar, ka shtim të rasteve të hospitalizimit.

Për të mos pasur situatë të jashtëzakonshme me të infektuar edhe me të hospitalizuar, kërkohet zbatim strikt i masave dhe veprime urgjente dhe masa më të ashpra. Në tërë këtë situatë, shkollat fillore dhe të mesme do të jenë të hapura, por me mbikëqyrje si deri më tani, ndërsa universitetet vazhdojnë me ligjërata online”, ka shkruar Zemaj.

Ndryshe, sot është mbajtur mbledhja e Komitetit për menaxhimin e pandemisë, e cila kishte karakter informues mbi efektin e vendimit të Qeverise për masat e marra nga Ministria e Shëndetësisë, të cilat janë adresuar për miratim në Qeveri.

Në 24 orët e fundit në Kosovë janë regjistruar 13 vdekje dhe 637 raste të reja me COVID-19. Numri total i rasteve pozitive është 24.792 raste nga 108.482 persona të dyshimtë në virusin SARS-CoV-2 dhe 768 raste të vdekjes.

Gjatë 24 orëve të fundit, janë shëruar 104 pacientë derisa numri i përgjithshëm i të shëruarve deri më sot është gjithsej 16.226 raste, kurse numri i rasteve aktive është 7.798.