Rastet me COVID-19 në Kosovë vazhdojnë të jenë të larta. Kjo pasi që Qeveria mori vendim për lirimin e masave kufizuese.

Që nga 13 marsi kur edhe u shënuan rastet e para me këtë virus, në IKSHPK janë testuar 23 mijë e 780 persona, ku pozitiv me Covid-19 kanë rezultuar 2 mijë e 878 persona, kurse 51 kanë përfunduar me fatalitet.

Janë shëruar 1 mijë e 577 pacientë, ndërsa 1 mijë e 250 raste mbeten aktive.

Numri total i rasteve pozitive 2 mijë e 878 raste nga 23 mijë e 780 persona të dyshimtë në virusin SARS-CoV-2, me gjithsej 51 raste të vdekjes të cilët kanë pasur sëmundje të tjera shoqëruese Sot më 30 qershor 2020, janë shëruar 71 pacientë derisa numri i përgjithshëm i të shëruarve deri më sot është gjithsej 1 mijë e 577 raste, kurse raste aktive 1 mijë e 250”, thuhet në njoftimin e fundit të IKSHPK-së.

Kryeministri Avdullah Hoti, por edhe ministri i Shëndetësisë, Armend Zemaj, kanë paralajmëruar kthimin e masave, nëse rastet vazhdojnë të shënojnë rritje.

IKSHPK vazhdimisht po bën thirrje për respektim të rekomandimeve shëndetësore, me theks të veçantë bartjen e maskave, mbajtjen e distancës dhe higjienës personale.