“I just shot John Lennon” (Sapo kam qëlluar John Lennon), ishin fjalët të shqiptuara me ton të ftohtë dhe cinik, më 8 dhjetor 1980, nga Mark David Chapman, i cili i dha fund jetës së kantautorit të madh.

Lennon kishte mbushur 40 vjeç vetëm dy muaj më parë, më 9 tetor.

Dhe 40 vjet më parë vdekja e tij tronditi botën e veçanërisht një brez, i cili ishte rritur duke u ushqyer me idealet e paqes që gjithashtu frymëzoi albumin e tij më të suksesshëm “Imagine” (1971), kënga me të njëjtin titull i të cilit u shndërrua në një himn ndërkombëtar të pacifizmit.

Natën e 8 dhjetorit 1980, Lennon ishte në shoqërinë e bashkëshortes, Yoko Ono, pasi të dy po ktheheshin në banesën e tyre, brenda ndërtesës “Dakota”, përballë njërës prej hyrjeve në Parkun Qendror, në rrugën 72.

Atë mëngjes fotografja e famshme e portreteve, Annie Leibovitz kishte qenë në shtëpinë e çiftit për të bërë një set fotografik për kopertinën e revistës “Rolling Stone” dhe kishte realizuar foton e famshme në të cilën Lennon krejtësisht i zhveshur përqafon dhe puth Onon, e veshur krejt në të zeza.

Rreth orës 22:50, Chapman u afrua në hyrje të ndërtesës “Dakota”.

Pas hyrjes së Lennonit me Onon, ai nxori një pistoletë të kalibrit 0,38 milimetra dhe gjuajti me pesë fishekë.

Katër prej tyre kapën Lennonin në shpinë, ndërsa një shpoi aortën. Ish-anëtari i “Beatles” mezi shqiptoi fjalën “Më qëlluan…”, para se të ndërronte jetë. Ai u dërgua menjëherë nga një patrullë policie në spitalin “Roosevelt”, ku u shpall i vdekur në orën 23:15.

Në vitin 1969 Lennon kishte thënë se “nuk kam frikë të vdes”. Sidoqoftë, 40 vjet më vonë, miti i John Lennon-it vazhdon të frymëzojë brezat.

Ai mbetet një nga ikonat më të fuqishme që ndonjëherë ka prodhuar kultura popullore, një njeri që falë muzikës dhe angazhimit për paqen ndryshoi botën.

Këtë vit, për shkak të pandemisë, nuk pritet të ketë ceremoni përkujtimore në Nju Jork për 40-vjetorin e ikjes së tij.