Abdixhiku: Qytetarëve t’u kthehen paratë për energji, bordi i ZRRE-së të shkarkohet

2 min read

Kryetari i LDK-së, Lumir Abdixhiku, ka thënë se nga shkurti e deri më sot Qeveria  e Kosovës i ka detyruar qytetarët të paguanin kundërligjshëm rrymën madje me rritje deri në 100%. Abdixhiku ka kërkuar që qytetarëve tju kthehen paratë dhe bordi i ZRrE-së duhet të shkarkohet.

”Tarifat u detyruan t’i kthejnë. Tani duhet kthyer edhe paratë e plaçkitura kundërligjshëm për disa muaj rresht. Janë para tuaja; u janë marrë pa të drejtë. Dhe jo vetëm kaq. Bordi i Qeverisë e ZRRE-së, i njëjti që për muaj rresht e në mes të dimrit, ngarkoi familjet kosovare me çmime astronomike në energji – duhet të shkarkohet menjëherë. Ata s’kanë më asnjë kredibilitet”, ka shkruar Abdixhiku.

Ky i fundit ka theksuar se nga e hëna LDK do të nis procedurat parlamentare për sa i përket kësaj çështje.

”Shkarkimi është i paalternativë. Siç është e paalternativë dhe përgjegjësia morale e secilit deputet, ministër e vet kryeministrit që me bindje plot mbronin këtë vendim plaçke e diskriminimi që tani më ka marrë vulën e turpit e paligjshmërisë. Ktheni paratë; shkarkojeni Bordin; mbani përgjegjësi”, ka shkruar tutje Abdixhiku.

Zyra e Rregullatorit për Energji (ZRrE) e ka anuluar vendimin për shtrenjtimin e faturave të energjisë elektrike pas një mbledhjeje të jashtëzakonshme të mbajtur të premten. Kështu është bërë e ditur nga vetë ZRrE-ja me anë të një komunikate për media, pas vendimit të Gjykatës së Apelit, e cila e pa si të jashtëligjshme.

Gjykata e Apelit e ka vërtetuar vendimin e Gjykatës Themelore në Prishtinë me të cilin kishte pezulluar vendimin e Zyrës së Rregullatorit të Energjisë (ZRrE) për tarifat e reja të energjisë elektrike.

Gjykata Themelore në Prishtinë më 8 prill 2022 kishte aprovuar si të bazuar propozimin e paditëses/propozueses Partia Demokratike e Kosovës (PDK) dhe kishte pezulluar vendimin e ZRrE-së për tarifat e reja për energji elektrike.

Paraprakisht, ZRrE-ja më 9 shkurt 2022 kishte miratuar tarifat e reja për energji elektrike./21Media