Arrestohen dy persona për vrasje në tentativë në Prishtinë

Janë arrestuar sot dy persona të dyshuar për vrasje në tentativë, të ndodhur më 13 janar 2023, në rrugën “Bajram Bahtiri” në Prishtinë. Në njoftimin  Policisë së Kosovës bëhet e ditur se i dyshuar për këtë rast është edhe një person, i cili është ende në arrati.
“Sot nga hetuesit e njësisë së hetimeve të përgjithshme të rajonit të Prishtinës janë arrestuar dy persona të dyshuar për rastin ‘Vrasje në tentativë’ të ndodhur më datë 13.01.2023, në rrugën “Bajram Bahtiri” në Prishtinë. Arrestimi i të dyshuarve erdhi si rezultat i ndërmarrjes së veprimeve të nevojshme operativo-policore me ç’ rast policia identifikoi tre të dyshuar, dy nga të cilët janë arrestuar ndërkaq i treti është ende në arrati”, bëhet e ditur në njoftim.
Pjesë e operacionit policor për arrestimin e të dyshuarve ishin edhe tri bastisje të kryera në tri lokacione të ndryshme të piketuara si vendndodhje e të dyshuarve.
Ndërkohë që janë kryer veprimet hetimore të kësaj faze në drejtim të veprave penale “Vrasje në tentativë” si dhe “Mbajtje në pronësi kontroll ose posedim të pa autorizuar të armës”, të dyshuarit;
· D. K, mashkull, 23 vjeç, shtetas i Republikës së Kosovës, si dhe,
· D. A, mashkull, 32 vjeç, shtetas i Republikës së Kosovës, me aktvendim mbi ndalimin e personit të dyshuar të nxjerrë nga ana e prokurorit të shtetit, janë dërguar në qendrën e mbajtjes prej 48 orësh, për tu proceduar më tej./21Media