I arrestuari dyshohet se ka kryer krime lufte në Lipjan

I arrestuari dyshohet se ka kryer krime lufte në Lipjan

Një person është arrestuar gjatë ditës së sotme për shkak të dyshimit se ka kryer veprën penale “Krime Lufte kundër popullsisë civile”.

Personi i arrestuar me inicialet G.S është i nacionalitetit serb, shtetas i Republikës së Kosovës.

Këtë lajm e ka bërë të ditur Prokuroria Speciale e Republikës së Kosovës përmes një komunikate të dërguar për media.

“Prokuroria Speciale e Republikës së Kosovës, njofton opinionin se, sot, gjatë ditës është arrestuar i pandehuri G.S., i nacionalitetit serb, shtetas i Republikës së Kosovës, për shkak të dyshimit se në bashkëkryerje me të pandehurit e tjerë ka kryer veprën penale “Krime Lufte kundër popullsisë civile”.”, bëhet e ditur nga Prokuroria.

Më tutje në komunikatë thuhet se për të arrestuarin ekziston dyshimi se në bashkëpunim me të persona të tjerë të njësive ushtarake dhe policore të Serbisë në vitin 1999 kanë kryer krime lufte në Komunën e Lipjanit.

Prokuroria Speciale njofton se ekziston dyshimi i bazuar se gjatë periudhës kohore, 15 dhe 16 prill 1999, i pandehuri G.S., nё bashkëkryerje me tё pandehurit tjerë pjesëtarë të njësive rezervë të njësive ushtarake dhe policor të Serbisë, gjatë një ofensive të drejtuar kundër popullsisë civile në Komunën e Lipjanit dhe lokaliteteve për rreth, me përdorimin e forcës ushtarake, dhunës, plaçkitjes dhe frikësimit, fillimisht kanë dëbuar popullsinë civile shqiptare nga shtëpitë e tyre, e pastaj nga familjet të cilat ishin duke u përpjekur që të largohen nga sulmet dhe dhuna, të pandehurit i kanë ndarë dhjetëra persona, të cilët pastaj i kanë vrarë.”, thuhet në komunikatën e Prokurorisë.

Prokuroria ka kërkuar nga Gjykata Themelore në Prishtinë të arrestuarit t’i caktohet masa e paraburgimit./21Media