Bajrami: Buxheti i rishikuar së shpejti do të dërgohet në Qeveri dhe Kuvend

 

Ministrja e Financave, Hykmete Bajrami ka pritur sot në takim ambasadorin e Shteteve të Bashkuara të Amerikës në Kosovë, Philip Kosnett, të cilin e ka informuar se buxheti i rishikuar do të mbulojë financimin e plotë të pakos emergjente fiskale dhe do të përfshijë financimin e një programi të rëndësishëm për rimëkëmbje ekonomike si përgjigje ndaj dëmeve ekonomike e financiare të shkaktuara nga pandemia COVID-19.

Bajrami e informoi ambasadorin Kosnett rreth aktiviteteve të Ministrisë së Financave sa i përket menaxhimit të financave publike dhe projekteve tjera të rëndësishme në funksion të ruajtjes së stabilitetit makro-fiskal në vendin tonë.

Ajo foli për procesin e rishikimit të buxhetit të Kosovës i cili është në fazën përfundimtare dhe që së shpejti do të dërgohet për aprovim në Qeveri e pastaj në Kuvend.

Ambasadori Kosnett uroi ministren Bajrami për marrjen e detyrës së re dhe njëkohësisht shprehu gatishmërinë e Ambasadës Amerikane për të mbështetur Ministrinë e Financave dhe Qeverinë e Republikës së Kosovës në avancimin e proceseve që kanë të bëjnë me rimëkëmbjen ekonomike, fuqizimin e institucioneve dhe progresin e përgjithshëm të Republikës së Kosovës./21Media