Osmani: Uroj që Pashkët sot të jenë të mbushura me festë e gëzim

(Lajm i përditësuar)

Presidentja e Kosovës, Vjosa Osmani, i ka uruar Pashkët të gjithë besimtarëve katolikë.

Osmani, përmes një shkrimi në “Facebook”, ka uruar që kjo festë të jetë e mbushur me gëzim e begati.

“Festat sikur Pashkët, na rikujtojnë se fuqia e shpresës, besimit e dashurisë, gjithmonë triumfon mbi sfidat më të mëdha. Pashkët janë manifestim i vlerave tona të përbashkëta njerëzore, mbështetjes, humanizmit e solidaritetit, të cilat populli ynë vazhdon t’i kultivojë në vazhdimësi. Uroj që Pashkët sot të jenë të mbushura me festë e gëzim, e shtëpitë tuaja me begati”, ka shkruar Osmani.

“Për shumë mote, gëzuar Pashkët”, ka shtuar ajo.

Besimtarët katolikë festojnë Pashkët


Besimtarët katolikë në të gjithë botën sot festojnë Pashkët.

Pashka është kremtimi më i madh i kalendarit liturgjik të Kishës Katolike Romake dhe të kishave të tjera të krishtera që kremtojnë Ringjalljen e Jezusit, sipas Besëlidhjes së Re, tre ditë pas vdekjes së tij në kryq.

Kjo festë është e lëvizshme, që do të thotë se nuk ndodh në të njëjtën datë çdo vit. Pashka llogaritet në bazë të fazave të hënës dhe ardhjes së pranverës.

Në praktikë, kjo do të thotë që Pashkët janë gjithmonë të dielën e parë pas hënës së parë të plotë që bie më ose pas 21 marsit. Pashkët mund të shfaqen që në fillim të 22 marsit dhe deri më 25 prill, varësisht se kur ndodh hëna e plotë e Pashkës.

Sot në Katedralen “Shën Nënë Tereza” në Prishtinë, me fillim nga ora 11, do të mbahet mesha kryesore e Pashkës. Ndërkaq, në orën 19 Ipeshkvi i Kosovës organizon pritjen solemne me rastin e festës së Pashkës.

Back to top button