Bie numri i udhëtarëve në Kosovë

 

Në tremujorin e katërt të vitit 2020, numri i pasagjerëve që kanë shfrytëzuar trenin si mjet udhëtimi ishte rreth 15.000 ose 52% më pak krahasuar me tremujorin e katërt 2019, ka bërë të ditur sot Agjencia e Statistikave të Kosovës (ASK).

Në raportin “Statistikat e Transportit dhe Telekomunikimit” për tremujorin e katërt (TM4) 2020, me të dhëna mbi transportin ajror, hekurudhor, rrugor dhe telekomunikimin, u bë e ditur se transporti i mallrave me tren në tremujorin e katërt 2020 ishte rreth 145 mijë ton ose 5.06% më shumë krahasuar me të njëjtën periudhë 2019.

Sa i përket numrit të fluturimeve në tremujorin e katërt 2020, ishte 1.396 fluturime që paraqet një rënie prej 23% në krahasim me periudhën e njëjtë 2019. Numri i udhëtarëve që kanë shfrytëzuar aeroplanin si mjet transporti ishte rreth 377.000 ose 28.62%  më pak në krahasim me periudhën e njëjtë 2019.