Autoritetet bullgare njoftuan sot se do të dëbojnë një diplomat rus, një ditë pasi prokuroria zbuloi rolin e gjashtë rusëve në disa shpërthime të një depoje municioni disa vjet më parë.

“Ministria e Punëve të Jashtme e shpalli diplomatin një person të padëshirueshëm dhe u kërkoi autoriteteve ruse për bashkëpunim të plotë me hetuesit.”, tha ministria përmes një deklarate.

Ministrja e Jashtme bullgare, Ekaterina Zakhariev tha se “masa shtesë” mund të merren në ditët në vijim.

Bullgaria tradicionalisht ka mbajtur marrëdhënie të ngushta ekonomike me Rusinë, por që nga tetori 2019, tensionet kanë lindur midis dy vendeve për disa raste spiunazhi.

Një total prej tetë diplomatësh rusë dhe një asistent teknik në ambasadë janë dëbuar nga Bullgaria që nga viti 2019.

Zyra e prokurorit bullgar njoftoi të mërkurën se gjashtë rusë ishin në Bullgari gjatë shpërthimeve dhe shtoi se qëllimi ishte të parandalonte shpërndarjen e municioneve në Ukrainë dhe Gjeorgji në 2011 dhe 2015.

Prokuroria pretendon se lidhja e rusëve me “krime të rënda të kryera në territorin e vendeve të tjera” u krijua, duke aluduar në shpërthimin në depon e armëve çeke më 2014 dhe përpjekjen për vrasje me agjent nervor të ish-spiunit Sergei Skripalj në vitin 2018 në Britani të Madhe.