Sipas Hantkes, duhet të ekzistojë një vizion i përbashkët

Sipas Hantkes, duhet të ekzistojë një vizion i përbashkët

Instituti KIPRED dhe Instituti Riinvest me mbështetjen e Zyrës së Fondacionit Fredrich Elbert (FES) në Kosovë kanë organizuar sot konferencën ndërkombëtare të ekspertëve për t’i kontribuuar ndërtimit të konsensusit në mes të akterëve kyç në dialogun Kosovë-Serbi.

Sejdi Osmani, kryetar i Bordit në Institutin Riinvest ka thënë për procesin e dialogut Kosovë-Serbi se ka stagnuar dhe në disa aspekte edhe në kthim prapa në Kosovë, nga ana tjetër Serbia e ka keqpërdorur skajshmërisht pa përgatitjen e palës kosovare, për ndarjen e Kosovës dhe fushatën për heqjen e njohjeve të Kosovës.

Frank Hantke, drejtor i FES ka deklaruar se dialogu në mes Kosovës dhe Serbisë është mjaft me rëndësi dhe kërkon përpjekje të mëdha për bashkëpunim dhe miqësi në mes tyre për një të ardhme të përbashkët në Unionin Evropian.

“Duhet të ketë një vizion të përbashkët dhe drejtim të përbashkët. Gatishmëria për dialog ka kuptim ku të dyja palët janë të gatshëm të gjejnë një kompromis”, ka thënë Hantke.

Ndërsa, publicisti Veton Surroi në këtë panel ka treguar se janë katër rrafshe të paraqitura nga pala kosovare për dialog, përfshirë presidentin Thaçi me idenë e tij për korrigjim kufijsh, kryeministri me qëndrimet për taksën ndaj Serbisë, Ekipi negociator për platformën e dialogut, si dhe opozita LDK dhe LVV që nuk dëshirojnë të përfshihen në dialog.

Surroi ka thënë se konsensusi nuk është që po mungon veç te pala kosovare, por edhe te transatlantik. Mirëpo sipas tij, ajo çka ka filluar të ndryshojë tash, është fillimisht me letrën e presidentit Donald Trump që kërkon njohje reciproke.

Surroi ndër të tjera ka thënë se po ashtu ka mungesë të parimeve negociuese në Bruksel.