Digjet vetura e komandantit të policisë kufitare
Në orët e hershme të mëngjesit të sotëm është përfshirë nga zjarri vetura e komandantit të policisë kufitare në veri
Automjeti tip ‘Benz E-class’, pronë e komandantit të policisë kufitare G-31 në Bërnjak, afër Leposaviqit në orët e hershme të mëngjesit të sotëm është përfshirë nga flakët e fuqishme të zjarrit, ndërsa përveç dëmeve materiale nuk ka të lënduar në njerëz, bëjnë të ditur burime të KP-së.
Sipas këtyre burimeve, ngjarja ka ndodhur rreth orës 3:00 të mëngjesit të sotëm derisa automjeti ishte i parkuar para banesës së togerit të policisë, që ndodhet afër Qendrës së studentëve në veri të Mitrovicës. Siç bëhet e ditur, burimet më tutje kanë shtuar se dyshohet që zjarri ndaj automjetit të komandantit të policisë ka qenë i qëllimshëm.
Njësitë e zjarrfikësve kanë reaguar menjëherë duke shuar zjarrin, ndërsa edhe pjesëtarë të policisë kanë dalë në vendngjarje dhe po zhvillojnë hetimet me synim të identifikimit dhe kapjes së autorit.