“Do të ketë kontrolle të jashtëzakonshme për shoferët dhe për gjendjen teknike të autobusëve”

Njësia Rajonale e Komunikacionit Rrugor në Ferizaj, pas aksidentit tragjik që ka ndodhur më 25 korrik në Kroaci, ku kanë vdekur 10 qytetarë nga Kosova dhe disa të tjerë janë lënduar, sot i ka ftuar në një takim kompanitë e transportit publik të udhëtarëve nga rajoni i Ferizajt .
Policia ka informuar se pas sugjerimeve dhe rekomandimeve, që i janë dhanë përfaqësuesve të këtyre kompanive, do të marrë të gjitha masat e nevojshme, ku do të bëjë kontrolle të jashtëzakonshme të tyre, si për shoferët, ashtu edhe për gjendjen teknike të autobusëve. Përveç këtyre, do të merren masat edhe për çdo parregullsi do të marrë masat adekuate sipas ligjit të komunikacionit rrugor, me qëllim parandalimin e aksidenteve në komunikacionin rrugor.
“Nga policia, janë dhënë rekomandime, që kompanitë e transportit publik të udhëtarëve, të sigurohen se, a kanë caktuar drejtues ( shoferë) të autobusëve me përvojë, të sigurohen se këta shoferë, a janë në gjendje të mirë shëndetësore, bazuar edhe në certifikatat e tyre mjekësore, siç është përcaktuar me ligj, të sigurohen gjithashtu se, a janë duke  i respektuar të gjitha rregullat dhe ligjet e komunikacionit rrugor, edhe sa i përket kohëzgjatjes së drejtimit të autobusit dhe a janë prezent edhe ndihmës shoferët, gjatë transportit në linjat ndërkombëtare,  si dhe masat tjera mbi gjendjen teknike të këtyre automjeteve.”, ka njoftuar policia përmes komunikatës.
Në fund të këtij takimi palët janë dakorduar që të mbahet edhe një takim tjetër gjatë javës edhe me përfaqësues të institucioneve lokale dhe qendrore nga fusha e transportit./21Media