Dorëhiqet Kryeministrja e Danimarkës

Kryeministrja e Danimarkës, Mette Frederiksen, ka dhënë dorëheqje, raporton “The Guardian“.

Frederiksen ka konfirmuar se ka dorëzuar dorëheqjen e qeverisë së saj, pasi është e qartë se qeveria në largim me tre parti nuk do të ketë mjaft mandate për të vazhduar.

Ajo ka theksuar urgjencën për të formuar qeverinë e re, duke thënë se “bota nuk po pret për ne atje jashtë”.
“Duhet të gjejmë një mënyrë se si të bashkëpunojmë,” ka deklaruar ajo.

Frederiksen ka dorëzuar dorëheqjen nga posti gjatë takimit të saj me Mbretin Frederik.

Pritet që Frederiksen të qëndrojë në detyrë si kryeministre kujdestare deri të formohet administrata e re – dhe gjithashtu mbetet ende një nga favoritët për të marrë postin kryesor.

Është thirrur një takim i partive politike, ku do të shqyrtohen opsionet e mundshme përpara.

Rezultatet treguan se kryeministrja Mette Frederiksen dhe Partia e saj Socialdemokrate humbën terren krahasuar me zgjedhjet e fundit në 2022, ashtu si edhe dy partnerët e saj në qeverinë në largim.

As blloku me orientim të majtë dhe as ai me orientim të djathtë nuk arritën një shumicë në parlament.