Ministri në detyrë i Integrimit Evropian, Blerim Reka priti sot shefin e Misionit të EULEX-it, Lars Gunnar Wigemark, me të cilin bisedoi për mbështetjen e këtij misioni të Bashkimit Evropian për sundimin e ligjit në Kosovë.

Shefi i Misionit të EULEX-it, siç njoftoi MIE, u njoftua mbi të arriturat e qeverisë në 100 ditët e para të saj të qeverisjes, ku pjesë thelbësore e programit qeverisë është sundimi i ligjit, prandaj edhe shumica dërmuese e 192 vendimeve qeveritare të ndërmarra janë në funksion të zbatimit të ligjit në vend.

“Ministri Reka theksoi se këtë nuk e bëjmë sa për të jetësuar Agjendën Reformuese Evropiane, por për shkak të funksionimit të Republikës së Kosovës, si shtet i së drejtës me ligjin mbi të gjithë dhe jo si shtet privat.”, u bë e ditur në komunikatë.

Më tutje, Reka kërkoi nga Wigemark që EULEX-ti të vazhdojë të ndihmojë institucionet e Kosovës në sundimin e ligjit, si dhe për gjetjen dhe identifikimin e personave të zhdukur gjatë luftës në Kosovë.

Ndërsa, shefi i Misionit të EULEX-it, Wigemark tha se “EULEX-i është dhe vazhdon të mbetet partner përkrahës i institucioneve të Kosovës në sundimin e rendit dhe ligjit në vend, të cilat janë edhe parimet thelbësore mbi të cilat është krijuar dhe funksionon Bashkimi Evropian”.

“Wigemark informoi Ministrin Reka rreth punës që EULEX bënë në Kosovë për identifikimin e personave të zhdukuar. Njëherit, z.Wigemark falënderoi Ministrin Reka për qasjen bashkëpunuese të tij, si dhe mbështetjen e synimeve të misionit të EULEX në Kosovë në funksion të sundimit të ligjit në vend.”, bëri të ditur ministria përmes komunikatës./21Media