Finlanda mbyll autostradën për shkak të stërvitjes së avionëve luftarakë

Finlanda ka mbyllur një pjesë të njërës prej autostradave të saj kryesore për pesë ditë për herë të parë në dekada, për të lejuar avionët luftarakë të praktikojnë uljen dhe ngritjen.
Vendi nordik, i cili aplikoi për anëtarësim në NATO pasi Rusia pushtoi Ukrainën fqinje, ka disa pista rezervë të ngjashme në të gjithë vendin që janë të destinuara për përdorim gjatë kohës së luftës.
Por baza e rrugës rezervë, në Joutsa në Finlandën qendrore, nuk është përdorur për dekada për shkak të rëndësisë si një autostradë që lidh kryeqytetin Helsinki me pjesët më të largëta veriore të vendit.
“Forcave ajrore iu deshën vetëm disa ditë për të pastruar anët e rrugës për stërvitjet ku përfshiheshin rreth 200 persona me avionë luftarakë finlandezë F/A-18 Hornet, avionë më të vjetër Hawk Mk 51 dhe avionë të tjerë ushtarakë”, tha kolonel Vesa Mantyla, kreu i Akademisë së Forcave Ajrore Finlandeze.
Në mënyrë që forcat ajrore të mbrojnë flotën e tyre, avionët mund të vendosen në të gjithë vendin, ndaj çdo vit kryhen ushtrime rrugore.
“Kërcënimi nga Rusia dhe operimi i raketave ruse dhe balistike (në Ukrainë) dëshmon se koncepti i operacioneve të përhapura është i saktë”, tha Mantyla.