Ministrja e Punëve të Jashtme, Meliza Haradinaj – Stublla, në një video-konferencë me ambasadorin britanik në Prishtinë, Nicholas Abbott, ka shprehur mirënjohjen për Londrën zyrtare për qëndrimin parimor në përkrahje të pavarësisë dhe integritetit territorial të Kosovës në raport me marrëveshjen finale me Serbinë.

“Aleatët kyç si Mbretëria e Bashkuar, i kanë qëndruar afër popullit dhe shtetit të Kosovës pandërprerë përgjatë rrugëtimit tonë të çlirimit, rindërtimit dhe pavarësisë. Përkrahja britanike në ndërtimin dhe profesionalizimin e Forcës sonë të Sigurisë dhe integrimin e saj drejtë NATO-s, mbetet e pazëvendësueshme”, tha ministrja Haradinaj – Stublla.

Ajo ka shprehur vullnetin e Qeverisë së Republikës së Kosovës që ky proces të thellohet edhe më tej, deri në anëtarësimin e plotë në strukturat euro-atlantike.