Haxhiu: Organet e drejtësisë të merren seriozisht me raportin e Auditimit të vitit 2021 për MSh

Raporti i auditimit për pasqyrat financiare të Ministrisë së Shëndetësisë për vitin 2021 po shihen shqetësuese nga PDK, madje kërkojnë nga organet e drejtësisë të merren me këtë raport.
E ky raport mori mbështetjen e deputetëve të Kuvendit të Kosovës.
Deputetja e Lëvizjes Vetëvendosje, Yllza Hoti tha se ky raport i auditimit ka opinion të kualifikuar që kanë të bëjë kryesisht me gabime teknike.
“Ky raport i Auditimit ka opinion të kualifikuar megjithatë është mirë të potencohet se të arsyetimet në bazë për opinion të kualifikuar kanë të bëjnë me gabime teknike me procedurat e kontabilitetit më saktësisht kanë të bëjnë me keq klasifikim dhe kategorizim të gabuar të shpenzimeve, por nuk ka ndonjë gjetje për dëmtim të buxhetit”, tha ajo.
E deputeti i PDK-së, Bekim Haxhiu tha se të gjeturat e Auditorit për ministrinë e Shëndetësisë nuk janë teknike por vepra penale.
Sipas tij kjo qeveri e cila mori pushtetin me arsyetimin se do ta menaxhojnë më mirë paranë publike, raporti i auditimit ka shtuar edhe 5 gjetje të reja.
Madje ai ftoi edhe organet e drejtësisë që ta marrin me seriozitet këtë raport.
“Kemi të bëjmë me jo gabime teknike por kemi të bëjmë me vepra penale, veprat penale të identifikuara në raportin e Auditorit janë të gjetura të mëdha se ky raport ka 9 të gjetura prej tyre 5 të reja pra atë që premtonin se do të menaxhojnë shumë më mirë paranë publike besimi 51% e morën për të menaxhuar më mirë paranë publike, auditori ua ka gjetur edhe 5 të gjetura më shumë në MSh në vitin 2021. Ky raport i Audimit do të duhej të trajtohej në vitin e kaluar dhe kjo përbënë jo seriozitet në trajtimin e të gjeturave nga auditori”, tha ai.
Edhe bashkëpartiaku i Haxhiut, Hajdar Beqa u pajtua që raporti i auditimit ka elemente të kryerjes së veprave penale.
“Në këto të gjetura ka elemente të kryerjes së veprave penale dhe mendoj që është në interes publik që Prokurorit i shtetit në bazë të detyrës zyrtare dhe Kodit Penal dhe Procedurës Penale eksoficio të merret me këto çështje”, tha ai.
Më pas ministri i Shëndetësisë, Arben Vitia u shpreh se të gjitha rekomandimet e raportit të Auditimit do të zbatohen.
“Pajtohem me zotëri Haxhiun që nuk qenka këtu, ky është një raport që nuk mund të ndryshoj dhe ky është një raport që e ka dhënë Zyra Kombëtare e Audimit dhe ne e dimë çka do të thotë ajo ne e dimë që ky raport i auditimit nuk ka nevojë për diskutim por duhet zbatuar. Të gjitha ato rekomandime që i ka dhënë raporti ne jemi shumë të hapur që të punojmë dhe duke e njohur administratën e MSh jam shumë i sigurt se do t’i ndërmarrë të gjitha hapat e nevojshëm dhe të domosdoshëm për të adresuar të gjitha rekomandimet që kanë dal nga ky raport….Nëse nuk janë shkelje teknike po janë shkelje të natyrës së veprave penale dhe ZKA e ka obligim me i paraqitur në Prokurorinë e Shtetin dhe ne mund të premtojmë se si ministri bashkë me administratën që secila gjetje të shkoj deri në fund”, theksoi ai.