Kryeministri i Republikës së Kosovës, Avdullah Hoti, ka pritur sot në takim ambasadorin e Austrisë në Kosovë, Christoph Weidinger.

Hoti fillimisht falënderoi ambasadorin Weidinger për mbështetjen e vazhdueshme që Austria i ka dhënë Kosovës në të gjitha proceset e rëndësishme nëpër të cilat ka kaluar vendi ynë.

Sipas një komunikate për media, duke e vlerësuar veçanërisht të rëndësishëm partneritetin dhe miqësinë e Kosovës me Austrinë, Hoti e njoftoi ambasadorin Weidinger për zhvillimet e përgjithshme në vend, me theks të posaçëm në përkushtimin e Qeverisë për menaxhimin e pandemisë COVID-19, por edhe masat që po ndërmerren për rimëkëmbjen e ekonomisë së vendit, fuqizimin e sundimit të rendit dhe ligjit, luftën kundër krimit të organizuar dhe korrupsionit, agjendën e reformave evropiane, procesin e dialogut me Serbinë.

Ndërsa, ambasadori Weidinger e falënderoi Hotin për pritjen dhe shprehu zotimin e Austrisë për fuqizimin e partneritetit dhe intensifikimin e bashkëpunimit në mes të dyja vendeve./21Media