Zyrtarët amerikanë kanë dhënë autorizimin urgjent për një trajtim eksperimental të antitrupave që i janë dhënë presidentit Trump pas diagnozës së tij Covid-19.

Bari i prodhuar nga Regeneron, do të lejohet për përdorim tek njerëzit që kanë rezultuar pozitivë për virusin dhe rrezikojnë të manifestojnë  sëmundje të rëndë, përcjell portali rtv21.tv

Studimet sugjerojnë se terapia është efektive kur administrohet herët pas diagnozës, thotë kompania.

Kjo vjen ndërsa rastet e Covid-19 në SHBA vazhdojnë të rriten.

Autorizimi i urgjencës nga Administrata e Ushqimit dhe Barnave (FDA) lejon përdorimin e një trajtimi ndërsa kryhen studime për të përcaktuar sigurinë dhe efektivitetin.

Një ilaç i ngjashëm i bërë nga Eli Lilly, një tjetër firmë farmaceutike amerikane, iu dha miratimi emergjent në fillim të këtij muaji.

Trajtimi Regeneron është një kombinim i dy antitrupave monoklonalë – antitrupa të fuqishëm, të bërë në laborator – të cilët imitojnë përgjigjen tonë imune. Ata fizikisht ngjiten në koronavirusin kështu që nuk mund të futen brenda qelizave të trupit.

Kompania që prodhon Regeneron tha se pritet të ketë doza të mjaftueshme për rreth 80,000 pacientë deri në fund të këtij muaji dhe 300,000 në total deri në fund të Janarit. Trajtimi do të ofrohet falas, por pacientët mund të duhet të paguajnë për administrimin e tij.

FDA tha se trajtimi nuk ishte i autorizuar për pacientët Covid të cilët ndodhen në spital ose kërkojnë oksigjen./21Media