Imri Ahmeti jep betimin për kryetar të Lipjanit, zotohet se do të punojë me përgjegjësi

Kryetari i Lipjanit, Imri Ahmeti ka dhënë betimin për herë të tretë si kryetar i kësaj komune.
Kryetari i rizgjedhur, Ahmeti në seancën inauguruese të Kuvendit Komunal të Lipjanit ka thënë se verdikti i votuesve në zgjedhjet lokale të 17 tetorit e ka bërë krenar, por edhe përgjegjës që në mandatin e ardhshëm katër-vjeçar të punojë fort e me për të zhvilluar qytetin.
”Vërtet për mua është jo vetëm ditë e veçantë që për të tretën herë po rifilloj detyrën e kryetarit të komunës. Prandaj, i jam mirënjohës qytetarëve që më kanë bërë krenar për vlerësimin tuaj, por ju edhe më obligoni shumë që ne të punojmë fort, të punojmë me përgjegjësi për të zhvilluar komunën tonë. Për mua para së gjithash është obligim dhe përgjegjësi e jo privilegj. Është detyrë e shenjtë e jo pozitë, është synim e vizion i zhvillimit të mëtutjeshëm të komunës tonë e jo punë e zakonshme, por edhe detyrim për të vazhduar me dinamikë e insistim ndërtimin dhe zhvillimin e komunës tonë”, ka thënë Ahmeti.
Ky i fundit po ashtu ka thënë se parimi i respektimit të ligjit do të jetë bazament i përhershëm i punës së tij në komunën e Lipjanit.
Ahmeti me këtë rast ka konfirmuar se do të jetë i gatshëm të bashkëpunojë me të gjithë qytetarët e Lipjanit dhe me të gjitha strukturat e partive pa dallim në të mirë të zhvillimit të mëtutjeshëm të Lipjanit, qytetit dhe fshatrave të komunës.
Imri Ahmeti nga LDK-ja ka fituar në raundin e parë të zgjedhjeve pa balotazh në zgjedhjet e 17 tetorit ku në garë ishte me kandidatët Adnan Rrustemi nga Lëvizja Vetëvendosje, Hyzer Rizani nga PDK-ja dhe Bashkim Budakova nga AAK./21Media