Jashari sot priti në takim kryeministrin Haradinaj

Jashari sot priti në takim kryeministrin Haradinaj

Pas homazheve të bëra në Prekaz, kryeministri Ramush Haradinaj ka vizituar edhe kullën e Jasharajve ku aty është pritur nga vëllai i komandantit legjendar Adem Jashari, Rifati.

Haradinaj ka thënë se është e mrekullueshme të shohësh njerëz nga të gjitha trevat shqiptare që kanë vizituar sot Prekazin për të bërë homazhe.

“Është e mrekullueshme të shohësh sot të gjithë këta njerëz nga të gjitha anët e atdheut. Falë Zotit që gjaku dhe mundi nuk është humbur dhe ai gjak ka dalë në dritë dhe dritë u bëftë për të gjithë këtë popull”, ka potencuar Haradinaj.

Nga ana tjetër, Rifat Jashari, ka falenderuar kryeministrin dhe të gjithë njerëzit që sot po e vizitojnë duke e thënë se ia largojnë dhimbjen. Ai ka thënë se tashmë duhet të punojmë për avancimin e shtetit.

“Çfarë kënaqësie të shohësh ushtrinë e Kosovës aty në oborr, duke ditur se para 21-vitesh aty ka qëndruar dikush tjetër dhe është folur një gjuhë tjetër. Falë Zotit e arritëm këtë ditë. Tashmë duhet të punojmë nga më i vogli e deri tek më i madhi për të avancuar ushtrinë dhe shtetin e Kosovës”, ka deklaruar Rifat Jashari.

Më 5, 6 dhe 7 mars të vitit 1998 është zhvilluar njëra ndër betejat më të rëndësishme të  Ushtrisë Çlirimtare të Kosovës ku ka rënë heroikisht komandanti legjendar, Adem Jashari dhe anëtarë tjerë të kësaj familje.

Për nder të 21 vjetorit të “Epopesë së UÇK-së” sot Kuvendi i Kosovës do të mbajë një seancë solemne si dhe në orët e pasdites mbahet një akademi përkujtimore.