Kapet në Stamboll kreu i kartelit të drogës ‘Kompanio Bello’

Arrestohet Dritan Rexhepi kreu i një karteli droge që transportonte kokainë nga Amerika e Jugut drejt Evropës, kështu kanë raportuar mediat turke.

Sipas tyre Rexhepi është arrestuar në aeroportin e Stambollit pasi që ka tentuar të hyjë në Turqi me pasaportë kolumbiane.

Ministri turk i Punëve të Brendshme, Ali Yerlikaya përmes një postimi në platformën X tha se është konstatuar se Rexhepi ka hyrë në Turqi nga aeroporti i Stambollit me pasaportë kolumbiane të regjistruar në emrin e Benjamin Omar Perez Garcia.

Po ashtu thuhet se ai porositi pengmarrjen dhe vrasjen e Jan Prengës.

Kush është Dritan Rexhepi?

Rexhepi i cili ka disa identitete, është regjistruar me emrat Ioannis Dionysopoulos (emër grek), Lulzim Murataj (emër shqiptar) e Gramoz Rexhepi (emër shqiptar).

Për shqiptarin ka tre ‘alarme të kuqe’ nga Interpol-i, pasi ai ka tre arratisje të regjistruara: në vitin 2006, nga Policia e Durrësit, në Shqipëri, në 2011, nga burgu i Vogheras, Itali, dhe nga burgu Merksplas, Belgjikë, në të njëjtin vit.

Dritan Rexhepi rezulton i dënuar në mungesë me 25 vite burgim në Shqipëri, për vrasjen e dy policëve në Fushë-Krujë, Arben Keqi e Durim Kasmi, ngjarje kjo e ndodhur në vitin 1998. Por pavarësisht këtij dënimi, është arritur të mësohet se në vitin 2013, ai ka hyrë në territorin shqiptar me emrin Lulzim Murataj e nuk është pikasur nga autoritetet.

Fillimisht, ai është arrestuar në vitin 2007 në ambientet e “Hotel Tirana” së bashku me Nadien Zeneli. Pas arrestimit është transferuar në Durrës, pasi oficerët e Drejtorisë së Policisë Durrës kishin kryer të gjithë operacionin për zbulimin dhe prangosjen e tij. Këtu ndodhi edhe arratisja e tij e parë.

Rexhepi në fakt ka mundur tu ikë nga ambientet e komisariatit të policisë Durrës, pasi oficeri Albert Strati dhe zëdhënësja e policisë së Durrësit, e kishin nxjerrë nga dhoma e shoqërimit, për t’i bërë një foto, me qëllim publikimin e lajmit të arrestimit të tij, në shtypin e kohës. Ai u largua në momentin që sapo u fut në qeli pas marrjes në pyetje, pasi dera e qelisë ishte lënë hapur. Në vetëm pak sekonda, Rexhepi ndodhej në rrugë i lirë.

Rexhepi ka mundur që të arratiset edhe nga burgu i sigurisë së lartë i Pavias, të Italisë, së bashku me dy shqiptarë të tjerë. Në korrik të 2011-s, ai u arrestua për grabitjen e një prej bankave më të mëdha në Barcelona, por arriti që prap të arratisej.

Back to top button