Presidenti i Kosovës, Hashim Thaçi, ka thënë se për dallim nga Qeveria e shkarkuar, Komisioni i Venedikut shpreh besim dhe mbështetje të plotë për gjykatën tonë.

Këtë deklaratë Thaçi e ka bërë përmes një postimi në Facebook, pas vendimit të Komisionit të Venedikut që të pritet përgjigja e Gjykatës Kushtetuese rreth krijimit apo jo të Qeverisë Hoti.

“Komisioni i Venecias kundërshtoi kërkesën e Qeverisë për interpretimin e Kushtetutës, ndërsa e njëjta çështje është në pritje të Gjykatës Kushtetuese. Për ndryshim nga Qeveria e shkarkuar, Komisioni i Venecias shpreh besim dhe mbështetje të plotë për gjykatën tonë. Në të njëjtën kohë, shpreh disponueshmërinë për të bashkëpunuar me autoritetet e Kosovës për çështje të tjera që janë në kompetencën e tyre”, ka shkruar Thaçi.

Në fund Thaçi ka shkruar se respektimi i vendimeve dhe autoritetit të Gjykatës Kushtetuese është thelbësor për sundimin e ligjit në Kosovë. /21Media