Kurti e Osmani kujtojnë Zahir Pajazitin: Republika e Kosovës u ndërtua e mbi gjakun e dëshmorëve të UÇK-së

Presidentja e Kosovës,  Vjosa Osmani, kryeministri Albin Kurti si dhe zv/kryeministrja Donika Gërvalla kanë bërë sot homazhe te shtatorja e heroit, Zahir Pajaziti.
Osmani tha se sot i përkujtojmë për frymëzimin e jashtëzakonshëm që dhanë Zahir Pajziti me shokë, për të gjithë ushtarët e Ushtrisë Çlirimtare të Kosovës, për të gjithë ata që luftonin së bashku me të duke iu dhënë frymëzim edhe më të madh, por edhe gjithë të tjerët që iu bashkuan UÇK-së pas rënies së tyre.
“Kjo ditë është prej ditëve më të lavdishme të UÇK-së dhe të gjithë Republikë së Kosovës që u ndërtua mbi themel të forta dhe ato mbesin të forta pikërisht se u ndërtuan mbi gjakun e dëshmorëve dhe heronjve tanë. Natyrisht që përkujtimi për ta, respektimi për ta do të mbesë i përjetshëm, por edhe puna jonë e përditshme në forcimin e shtetit që u ndërtua me gjak e sakrificë do ta ketë udhërrëfyes, pikërisht këtë sakrificë e këtë heroizëm. Pikërisht shembullin e tyre që u dha 26 vjet më parë”, deklaroi presidentja Osmani.
Haradinaj kujton Zahir Pajazitin, Hakif Zejnullahun dhe Edmond Hoxhën
Kryetari i Aleancës për Ardhmërinë e Kosovës, Ramush Haradinaj ka kujtuar komandantin Zahir Pajaziti dhe bashkëluftëtarët e tij, Hakif Zejnullahu dhe Edmond Hoxha në përvjetorin e rënies. Haradinaj ka thënë se sakrifica e tyre, trasoi rrugën drejt lirisë dhe pavarësisë së Kosovës.
“Zahiri, Edmondi dhe Hakifi do të jenë përherë pjesë e kujtesës sonë historike!”, ka shkruar Haradinaj në Facebook.
Zahir Pajaziti, Hakif Zejnullahu e Edmond Hoxha, luftëtarët e radhëve të para të Ushtrisë Çlirimtare të Kosovës, ranë heroikisht 26 vite më parë, në Pestovë të Vushtrrisë./21Media