Kryeministri në detyrë Albin Kurti, bashkë me ministren në detyrë të Arsimit, Shkencës, Teknologjisë dhe Inovacionit, Hykmete Bajrami dhe ministren në detyrë të Administrimit të Pushtetit Lokal. Emilija Redzepi, vizituan sot shkollën fillore “Emin Duraku”, në Prizren.

Shkolla fillore “Emin Duraku” ka filluar përgatitjen dhe realizimin e mësimit online që nga 12 marsi i këtij viti. Si një nga shkollat më të mëdha të komunës së Prizrenit, ajo ofron mësim për nxënësit e nivelit shkollor fillor në dy gjuhë, shqip dhe turqisht.  E njëjta, që nga përhapja e pandemisë COVID-19 në Kosovë, është përshtatur në studio për xhirimin e video mësimeve në tri gjuhë; shqip, turqisht dhe boshjankisht. Materialet mësimore të xhiruara në këtë shkollë janë shumë të vlefshme për komunitetet jo shumicë. Vetëm nga Komuna e Prizrenit nga mësimi online përfitues të drejtpërdrejtë janë 2 mijë e 127 nxënës të komunitetit boshnjak, 1 mijë e 387 nga komuniteti turk dhe 657 nga ai i rom, ashkali dhe egjiptas, të cilët së bashku përbëjnë 15% të totalit të nxënësve të shkollave fillore në këtë komunë. Sipas matjeve, 90% e nxënësve po e përcjellin mësimin online.

Kurti i falënderoi stafin e shkollës për punën dhe përkushtimin e treguar gjatë gjithë kohës, e në veçanti gjatë pandemisë.

Mësimdhënësit gjithmonë bartin një barrë me peshë të madhe për edukimin dhe arsimimin e gjeneratave të reja, dhe për këtë u jemi gjithnjë e gjithmonë mirënjohës“, thuhet në njoftimin e Zyrës së Kryeministrit./21Media