Kryeministri në detyrë Albin Kurti, vizitoi fshatin Nëpërbisht të Therandës dhe komunën e Mamushës, pas dëmeve të shkaktuara së fundmi nga breshri.

Kurti deklaroi se Qeveria e Kosovës do të ofrojë ndihmën e saj të pakursyer.

“Breshri i datës 19.05.2020 po përshkruhet nga banorët si më i madhi ndër dekada. Nga kjo fatkeqësi natyrore janë dëmtuar rëndë serrat në të cilat kultivohen produkte të ndryshme e nga të cilat furnizohet pjesa më e madhe e tregut të perimeve. Kjo vizitë pati për qëllim njoftimin nga afër me dëmet e shkaktuara dhe shprehjen e përkushtimit për t’i dalë në ndihmë fermerëve. Fillimisht do të bëhet evidentimi dhe vlerësimi i dëmeve, për çka veçse janë themeluar komisionet e përbashkëta, dhe mbi përfundimet e këtyre komisioneve, Qeveria e Republikës së Kosovës do të ofrojë ndihmën e saj të pakursyer”, tha Kurti.

Tutje Kurti deklaroi se  ballafaqimi me pandeminë COVID-19, në anën tjetër, ka treguar rëndësinë e investimeve në prodhimet vendore.

“Ne duhet t’i ndihmojmë prodhuesit vendorë edhe atëherë kur nuk ballafaqohet me fatkeqësi natyrore. Ballafaqimi me pandeminë COVID-19, në anën tjetër, ka treguar rëndësinë e investimeve në prodhimet vendore. Shtetet me prodhim vendor arrijnë të tejkalojnë krizat më lehtë. Nga kjo, dhe për këtë arsye, ne do ta forcojmë prodhimin vendor nëpërmjet përkrahjes dhe partneritetin me prodhuesit vendorë, ashtu sikurse është thënë edhe në programin qeverisës”, tha Kurti ndër të tjera.

Kurti në këtë vizit ishte me ministrin në detyrë të Bujqësisë, Pylltarisë dhe Zhvillimit Rural, Besian Mustafa dhe zëvendës ministrin e tij, Imri Demelezi. Delegacioni qeveritar, gjatë kësaj vizite u mirëprit dhe u shoqërua nga kryetarët e komunave respektive, Bali Muharremaj dhe Abdülhadi Krasniç, dhe pronarët e serrave të dëmtuara. /21Media