LDK: Qeveria s’ka asnjë të drejtë ligjore e morale që të ndërpresë pagat e mësuesve

Lidhja Demokratike e Kosovës ka konsideruar se Qeveria nuk ka asnjë të drejtë ligjore dhe morale që të ndërpresë pagat e mësuesve.

Sipas LDk-Së, komunat janë punëdhënësit dhe këtë të drejtë e kanë komunat si njësi themelore të vetëqeverisjes në Kosovë. “Qeveria thirret në Nenin 18 të Ligjit për Greva, duke injoruar në tërësi Nenin 13 i cili flet për mbrojtjen e të punësuarve gjatë grevës. Ky nen shprehimisht thotë se “Për organizuesit e grevës, pjesëmarrësve grevistë dhe ndaj të punësuarve të tjerë, të cilët mbështesin grevën, nuk mund të merren masa disiplinore apo materiale…”. Masat materiale në këtë raport kontraktual kanë të bëjnë pikërisht me pagën dhe kontributet. Dukshëm ka kundërthënie në mes të Nenit 13 dhe 18, me ç’rast kjo kundërthënie nuk mund të interpretohet në dëm të palës që nuk e ka hartuar ligjin, e që janë grevistët.”, është bërë e ditur në komunikatë.

Për LDK-në, të mos paguhen pagat në kohë krize është e pamoralshme.

“Këto nuk janë para të qeverisë që të bëjë çfarë të dojë, sikurse t’ju hakmerret mësimdhënësve. Në kohën kur inflacioni vetëm ka shkuar në 20%, dhe qytetarët veç janë në krizë, qeveria lë pa paga 23,173 mësimdhënës. Është e papranueshme që sapo mbyllet një krizë, hapet një tjetër. Qeveria me këto masa po varfëron familjet dhe, nëse vazhdon me këtë ritëm, do të rrisë numrin e kërkuesve të asistencës sociale. Me inflacion ka zvogëlim të pagave në mandatin e kësaj qeverie, kurse me hakmarrjen e fundit ka ndërprerje të të hyrave për mbi 23 mijë familje.”, ka shtuar tutje LDK.

Ndryshe, Ministrja e Arsimit, Arbërie Nagavci, sot ka deklaruar se kompensim do të ketë, por për punën e bërë.
Për muajin shtator, Qeveria e Kosovës ka deklaruar se ka ekzekutuar pagat vetëm për zyrtarët, të cilët kanë dalë në punë dhe kanë kryer detyrat e përgjegjësitë e tyre./21Media
 

Back to top button