Legjenda e United kritikon Ten Hag që ka humbur më shumë ndeshje se Solskjaer
Legjenda e Manchester United, Dwight Yorke ka vënë në pikëpyetje sugjerimet se klubi ka bërë progres nën drejtimin e trajnerit, Erik ten Hag.
“Djajtë e Kuq” kanë përmirësuar pozicionin këtë sezon, për dallim nga ai i kaluari, por janë në stres sa i përket vendit në top 4, pas humbjeve radhazi nga Brightonit dhe West Hamit, raporton KosovaPress.
Skuadra e Ten Hag ka fituar Carabao Cup këtë sezon dhe është në finale të FA Cup, por nuk ka mundur ta vendosë vetën në garë për titull, pasi që ka regjistruar nëntë humbje në kampionatin anglez.
Yorke, siç bëhet e ditur nga “Evening Standard”, ka vënë në pah që United ka pësuar më shumë humbje këtë sezon, se sa që ka pësuar nën urdhrat e Ole Gunnar Solskjaer gjatë dy sezonave të tij të plota në krye të klubit (tetë sosh në sezonin 2019/20 dhe gjashtë sosh në sezonin 2020/21).
Fituesi i tripletës me Unitedin në vitin 1999, i cili ishte bashkëlojtar me Solskjaer, insiston se rezultatet e United këtë sezon nuk kanë qenë të mira sa duhet dhe Ten Hag duhet të kritikohet për këtë gjë.
“Erik ten Hag ka humbur nëntë ndeshje në Premier Ligë dhe kjo gjë ngre disa shqetësime. Nëse je trajner i Manchester United, gjithmonë do të kontrolloheni për detaje ose gabime të vogla. Nuk ka ku të fshiheni.
Ole Gunnar Solskjaer kishte bilanc më të mirë se sa Ten Hag në dy sezonet e plota të tij në drejtimin e klubit, njerëzit flasin për progresin që e kemi bërë dhe stilin më të mirë të futbollit që e luajmë”, tha Yorke.
“United ka arritur finalen e FA Cup, fitoi Carabao Cup dhe shkoi larg në Ligën e Evropës, ky është progresi, por Ten Hag që humbi më shumë ndeshje të Premier Ligës se sa Solskjaer në sezonet 2019/20 dhe 2020/21 duhet vënë në pah.
Rezultatet nuk kanë qenë të mira këtë sezon, Manchester United po shikon mbi supe dhe me çdo kusht po mundohet ta mbajë vendin e katërt, nuk jam i sigurt që ky është vendi ku klubi dëshiron të jetë. Ten Hag merr lëvdatat kur ekipi luan mirë, por ai duhet të pranojë kritikat kur gjërat nuk shkojnë mirë”, tha më tej Yorke.
Solskjaer u përball me kritika të rënda gjatë fundit të aventurës së tij si trajner i United.