Afganistani me hapa të tjerë për arritjen e paqes

Afganistani me hapa të tjerë për arritjen e paqes

Qeveria afgane ka liruar nga burgu 100 talibanë, në veprimin e radhës për përmirësimin e raporteve me talibanët. Këto veprime vijnë pas arritjes së marrëveshjes  mes Shteteve të Bashkuara dhe talibanëve.

Këshilli për Siguri Kombëtare i Afganistanit ka njoftuar për lirimin e 100 të burgosurve të fundit.

Ky këshill tha se të burgosurit janë liruar për një varg arsyesh, siç është gjendja shëndetësore, mosha dhe kohëzgjatja e vuajtjes së dënimit.

Që prej 8 prillit, Qeveria afgane ka liruar në total 300 të burgosur talibanë.

Ndërkaq, një zëdhënës i talibanëve ka njoftuar se grupi militant do të lirojë 20 të burgosur dhe do t’i dorëzojë ata te Komiteti Ndërkombëtar i Kryqit të Kuq në Kandahar.

“Sot, 20 të burgosur nga administrata e Kabulit do të lirohen”, deklaroi zëdhënësi i talibanëve, Suhail Shaheen.

Shtetet e Bashkuara dhe talibanët më 29 shkurt nënshkruan një marrëveshje, ku bëhet thirrje që Qeveria e Afganistanit të lirojë rreth 5 mijë luftëtarë talibanë, si masë për të ndërtuar besimin mes palëve, para bisedimeve formale të paqes, që kanë për qëllim dhënien fund të konfliktit 18-vjeçar.

Talibanët, në anën tjetër, janë zotuar se do të lirojnë 1 mijë trupa të Qeverisë afgane dhe punëtorë civilë.