Lista Serbe ka njoftuar se në emër të dhjetë deputetëve të Listës Serbe dhe deputetëve të Partisë Unike Gorane ka bërë një ankesë në Gjykatën Kushtetuese ndaj Qeverisë Kurti.

Lista Serbe ka thënë se sipas Kushtetutës u takojnë dy ministri.

“Lista Serbe ka dorëzuar sot ankesë në Gjykatën Kushtetuese në emër të dhjetë deputetëve të Listës Serbe dhe deputetëve të Partisë Unike Gorane, për të mbrojtur interesat e qytetarëve serbë. Apeli konteston vendimin e Kuvendit në zgjedhjen e Qeverisë së Prishtinës më 22 mars, 2021, ku qytetarëve serbë iu dha të administrojnë vetëm një ministri, ndonëse sipas Kushtetutës është e obliguar t’u ndahen dy ministri. Lista Serbe pret që Gjykata Kushtetuese të vendos në përputhje të drejtave kushtetuese për respektimin e të drejtave të qytetarëve serbë, por edhe komuniteteve tjera joshumicë. Ne cekim se vendimi për t’u mohuar serbëve përfaqësim fer në institucionet e nivelit qendror është kundër gjitha akteve ligjore. Ne theksojmë se nuk na duhen pozita ministrore vetëm për hir të vendeve të caktuara, por si qëllim për të përmirësuar kushtet në të cilën jetojnë njerëzit tanë në Kosovë dhe Metohi”, thuhet në njoftimin e Listës Serbe.

Listës Serbe i është ndarë vetëm një ministri në Qeverinë Kurti 2, ndërsa i ka kërkuar dy ministri.