Përmes një komunikate me shkrim nga partia opozitare VMRO-DPMNE shkruajnë se nuk pajtohen me propozimin për orën policore gjatë kësaj fundjave, që korrespondon edhe me festën e Fitër Bajramit.

“Është e palogjikshme që të paralajmërohet se restorantet do të punojnë nga e marta, ndërsa të bëhet i detyrueshëm qëndrimi në shtëpi gjatë fundjavës së zgjatur. Me fjalë të tjera e diela dhe e hëna për Qeverinë e LSDM-së janë të rrezikshme, ndërsa e marta nuk është. Në bazë të cilave kritere është sjellë ky propozim?” pyesin nga partia e Hristijan Mickoskit.

Më tej në reagimin me shkrim thonë se VMRO-DPMNE pati konsideruar se edhe gjatë Pashkëve masa për orë policore të plotë është tejet shtrënguese, e e njëjtë është edhe kjo e propozuara tani për festën e Bajramit. “Në këtë mënyrë shkelen liritë dhe të drejtat e njeriut” shkruajnë nga DPMNE-ja, duke shtuar se me këto masa LSDM me vetëdije po hyn në provokime për tensione dhe konflikte mes qytetarëve dhe po e ekspozon policinë në rol të padëshiruar./21Media