AGK po punon në mënyrë vullnetare që procedura e shpërndarjes të zgjasë më shumë

AGK po punon në mënyrë vullnetare që procedura e shpërndarjes të zgjasë më shumë

Asociacioni i Gazetarëve të Kosovës, nesër do të fillojë me shpërndarjen e materialeve mbrojtëse për gazetarët, kameramanët dhe fotoreporterët.

Në donacionin e mundësuar nga Fondacioni i Kosovës për Shoqëri të Hapur (KFOS), bëjnë pjesë 313 maska respirator FFP2, 313 pako dorëza latex dhe 313 dezinfektues 500 ml. Vlera e një pako për person është 17.50 euro.

AGK ka kërkuar nga redaksitë që t’i dërgojnë vetëm emrat e gazetarëve, kameramanëve dhe fotoreporterëve të terrenit, të cilët janë më të rrezikuarit nga atakimi me virusin Covid-19.

”Përkundër kërkesës me emrat për kolegët tanë që janë pothuajse në vijë të parë të frontit me këtë pandemi, në adresë të AGK kemi pranuar mes tjerëve edhe emra të teknikëve, moderatorëve, redaktorëve e madje edhe emra të menaxherëve të medieve”, thuhet në njoftimin  e AGK-së.

AGK po punon në mënyrë vullnetare, që procedura e shpërndarjes të zgjasë më shumë, me qëllim të vetëm, që mjetet mbrojtëse t’u shpërndahen gazetarëve që punojnë në terren, e të cilët janë në rrezik të drejtpërdrejtë nga kjo pandemi.

”Duke filluar nga nesër 15 prill deri të premten më 17 prill, ora 10.00 deri në orën 16.00, gazetarët, kameramanët dhe fotoreporterët, mund të marrin pakon e tyre në zyrat e AGK-së’. Të njëjtit, mund të tërheqin pakon edhe për kolegët e tyre nga po i njëjti medium, mirëpo me vete duhet ta kenë ID-në e punës (në formë të printuar ,fotografuar, skanuar), ku specifikohet emri/mbiemri dhe pozita që kanë në medium”, njofton  AGK-ja.

Në fund thuhet se AGK-ja do të vazhdojë angazhimin drejt sigurimit të donacioneve tjera, në mënyrë që të ndihmohet komuniteti që përfaqësojmë dhe kolegëve tanë t’iu lehtësohet puna përgjatë pandemisë me koronavirusin e ri COVID-19. /21Media