Mbështetet zhvillimi i mjekësisë familjare

Ministria e Shëndetësisë e mbështetë zhvillimin e mjekësisë familjare

Kujdesi Parësor Shëndetësor është baza e një sistemi shëndetësor të qëndrueshëm, andaj Ministria e Shëndetësisë ka përkrahur dhe do të vazhdojë të përkrahë zhvillimin e konceptit të mjekësisë familjare si alternative më e mirë për zhvillimin e sistemit.

Kështu tha sot ministri i Shëndetësisë Imet Rrahmani në takimin e organizuar me rastin e fillimit të kohortit të ri në Specializimin e Mjekësisë Familjare për gjeneratën e radhës të mjekeve në Kosovë, që u mbajt në Qendrën për Zhvillimin e Mjekësisë Familjare në Prishtinë.

Ministri Rrahmani u dëshiroi suksese gjeneratës së re të specializantëve të Mjekësisë Familjare, duke vlerësuar se ata do të jenë vazhdimësi e gjeneratave të suksesshme që kanë krijuar baza të qëndrueshme të konceptit të Mjekësisë Familjare në Kosovë.

Ndërsa, dekanja e Fakultetit të Mjekësisë të Universitetit të Prishtinës, Suzana Manxhuka-Kërliu tha se Kujdesi Parësor Shëndetësor gradualishtv po e merr rolin e saj të rëndësishëm brenda sistemit shëndetësor, ndërsa Fakulteti i Mjekësisë sipas saj është i interesuar për integrimin e platformave të reja për ngritjen e edukimit shëndetësor, me qëllim të ngritjes së cilësisë edhe në kujdesin profesional shëndetësor.

Në këtë aspekt, ajo përmendi lansimin e E-laboratorit në Fakultetin e Mjekësisë që mund t’u shërbejë edhe specialistëve të mjekësisë familjare që të jenë në vijë me inovacionet e reja në mjekësinë globale.

Programi i Specializimit të Mjekësisë Familjare në Kosovë është program i akredituar ndërkombëtarisht nga Kolegji Mbretëro i Mjekëve të Përgjithshëm i Britanisë së Madhe (RCGP)./21Media