Në Kuvendin e Kosovës do të mblidhen sot shtatë komisione parlamentare.

Fillimisht do të mblidhet Komisioni për Çështje të Sigurisë dhe Mbrojtje. Në këtë komision që do të mblidhet në ora 10:00 ku pritet të diskutohet për zhvillimet në Policinë e Kosovës.

Po të njëjtën orë do të mblidhet edhe Komisioni për Qeverisje Lokale, Administratë Publike, Zhvillim Rajonal dhe Media ku do të miratohet procesverbali i mbledhjes së mbajtur më 29.09.2020 si dhe do të shqyrtohet raporti i Këshillit të Pavarur Mbikëqyrës për Shërbimin civil të Kosovës. Po ashtu, në këtë komision do të shqyrtohet Raporti Vjetor i Agjencisë së Statistikave të Kosovës.

Në orën 11:00 do të mblidhet Komisioni për Ekonomi, Punësim, Tregti, Industri, Ndërmarrësi dhe Investime Strategjike. Në këtë komisioni pritet të shqyrtohet në parim Projektligji nr.07/L-038 për identifikimin elektronik dhe shërbimet e besuara në transaksionet elektronike. Mirëpo, në këtë komision do të raportoj edhe ministri i Ekonomisë dhe Ambientit, Blerim Kuçi.

Kuçi do të raportoj për emërimet e fundit në bordet e përkohshme si dhe gjendjen dhe veprimet e Qeverisë së Kosovës për ndërmarrjen “Trepça” si dhe për funksionimin dhe operimin e hidrocentraleve. Të ftuar në komision do të jenë edhe nga bordi i ZRRE-së.

E në orën 13:00 do të mblidhet Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë Kundër Korrupsion. Në këtë komision është i ftuar edhe ministri i Drejtësisë, Selim Selimi. Pikë e rendit të ditës është ndryshimi dhe plotësimi i Ligjit nr.03/L-073 për zgjedhjet e përgjithshme në Kosovë.

Në këtë komision është paraparë të bëhet edhe formimi i Grupit të Punës për shqyrtimin e aplikacioneve për anëtar të KPK-së dhe KGJK-së.

Në orën 13:00 komisioni Hetimor Parlamentar lidhur me procesin e privatizimit në Kosovë do të intervistojë Bujar Dugollin, ish-ministër i Tregtisë dhe Industrisë (Ora 13:00) dhe Mrika Tahirin, ish- drejtore Menaxhuese në orën 14:00 (pritet të konfirmohet).(Kuvendi i Kosovës, salla N-10, ora 13:00).

Në orën 13:00 do të mblidhet edhe Komisioni për Arsim, Shkencë, teknologji, Inovacion, Kulturë, Rini dhe Sport.

Po ashtu, në orën 13:00 komisioni për Punë të Jashtme dhe Diasporë do të diskutojë mbi mbikëqyrjen e zbatimit të Ligjit për shërbimin e jashtëm të Republikës së Kosovës.