Vitin 2020 sporti i Kosovës e mbylli me dy medalje elitare, të cilat edhe këtë herë erdhën nga sporti i xhudos. Distria Krasniqi dhe Loriana Kuka fituan medaljet e bronzta në Kampionatin Evropian “Pragë 2020”, të mbajtur në muajin nëntor.

Krasniqi triumfoi në kategorinë deri në 48 kilogramë, në të cilën e mbylli vitin në vendin e parë të rënditjes botërore dhe renditjes Olimpike. Kuka medaljen e fitoi në kategorinë deri në 78 kilogramë. Ajo ndodhet brenda normës Olimpike Tokio 2020. Pikërisht Krasniqi e Kuka kanë shënuar suksesin më të madh edhe në Grand Slamin e mbajtur në Budapest në tetor, ku Distria ka fituar të artën ndërsa Loriana të bronztën. Se ishte viti i Distrias e dëshmon edhe Grand Slami i Parisit, i mbajtur në muajin shkurt, ku fitoi po ashtu të artën, ndërsa Nora Gjakova të bronztën.

Sipas Komitetit Olimpik të Kosovës, Xhudos nuk i munguan medaljet edhe në grupmoshat e reja. Laura Fazliu fitoi dy medalje evropiane. Ajo mori të argjendtën për U-21 dhe të bronztën për U-23, të dyja këto të fituara në Poreq të Kroacisë.

Medaljet për grupmosha të reja fitoi edhe karateja, në evropianin e mbajtur në Budapest të Hungarisë, gjatë muajit shkurt. Vesa Ibrahimi (-68 kg), Benjamin Shabani (+84 kg) dhe Albulena Gërvalla (-55 kg) fituan medaljet e bronzta për U-21, ndërsa Betim Maliqi e fitoi të bronztën për juniorë, kategoria -68 kg.

Dy medalje evropiane solli edhe boksi. Alnera Brahimi fitoi të argjendtën (-70 kg) për juniore në evropianin e mbajtur në Sofje të Bullgarisë, ndërsa Remzo Mustafiq (-90 kg), fitoi të bronztën në Budva të Malit të Zi, grupmosha 17-18 vjeçarë.

Dhjetori solli medalje evropiane edhe te taekwondo. Elion Agushi (-57 kg) dhe Jon Gashi (-61 kg) fituan medaljet e bronzta në kampionatin e mbajtur në Sarajevë.

Krahas evropianeve, sipas KOK-ut, veçohet edhe Kampionati Ballkanik U-20 në atletikë, i cili solli tri medalje, dy të arta për Muhamet Ramadanin (dy kampionate të ndryshme), në hedhje të gjylës 6 kg, si dhe një të bronztë të Alaudin Sumës, në hedhjen e diskut.

“Në përgjithësi, vendit tonë nga kampionatet evropiane i erdhën dy medalje elitare (seniorë) dhe 10 evropiane nga grupmoshat e reja, si dhe tri nga kampionatet ballkanike për grupmoshat e reja.”, bëri të ditur KOK.