LDK-ja më 1 qershor nis zgjedhjet e brendshme

(Lajmi i përditësuar)

Kryetari i LDK-së, Lumir Abdixhiku, ka njoftuar se kjo parti më 1 qershor do të hyjë në zgjedhje të brendshme.

Abdixhiku tha se të premten do të mblidhet këshilli i përgjithshëm për t’u përgatitur për këto zgjedhje, derisa theksoi se ky proces zgjedhor do të zhvillohet mbi 7 parime.

“Sot kryesia e LDK ka marrë vendim të shpallë zgjedhje të brendshme. Për ne ky proces është festë sepse gjithmonë LDK-ja ka besuar në demokraci”, ka thënë Abdixhiku në konferencën e sotme për media.

Kreu i LDK-së theksoi se synojnë që të kenë prezencë më të madhe të të rinjve në këtë proces zgjedhor dhe po ashtu tha se synojnë që njëra nga pozitat e nënkryetarit të jetë për një grua.

“S’ka mospajtime në mes partisë. Partia është më e bashkuar se kurrë. Të gjithë janë të interesuar të kemi një proces të hapur dhe të përfshirje të të rinjve dhe grave, si dhe një nga pozitat e nënkryetarit të jetë grua”, ka shtuar ai.

Ai po ashtu shtoi se kanë marrë vendim të hapin katër degë në komunat veriore të Kosovës, si dhe të kenë organizim territorial të degëve në mërgatë.

Abdixhiku tha se e fton çdo anëtar të marrë pjesë në këto zgjedhje.

Nis mbledhja e LDK-së

Kryesia e Lidhjes Demokratike të Kosovës (LDK) ka filluar mbledhjen, në të cilën pritet të diskutohet për shpalljen e zgjedhjeve të brendshme të partisë.

Zgjedhjet përfshijnë pozitën e kryetarit dhe strukturat e partisë.

Këto zgjedhje janë në kuadër të ciklit të rregullt zgjedhor katërvjeçar, që është i përcaktuar në statutin e LDK-së.

Ndryshe, zgjedhjet e fundit të rregullta në LDK janë mbajtur në vitin 2019.

LDK pritet të shpallë sot zgjedhjet e brendshme

Lidhja Demokratike e Kosovës do të mbajë sot mbledhje, në të cilën pritet të shpallen zgjedhjet e brendshme të partisë.

Mbledhja do të mbahet në orën 15:00.

Zgjedhjet përfshijnë pozitën e kryetarit dhe strukturat e partisë.

Back to top button