Të gjithë e përkrahën privatizimin e Telekomit, përveç deputetit Glauk Konjufca

Të gjithë e përkrahën privatizimin e Telekomit, përveç deputetit Glauk Konjufca

Komisioni për Zhvillim Ekonomik dhe Infrastrukturë në mungesë kuorumi nuk e dërgoi në Kuvend vendimin e Qeverisë për Privatizimin e Telekomit të Kosovës.

Gjatë mbledhjes, shumica e anëtarëve të këtij komisioni e përkrahën privatizimin e Telekomit, përveç deputetit të VV-së, Glauk Konjufcës. Ndërsa, u theksua nevoja që në këtë proces të ketë transparencë.

Ministri për Zhvillim Ekonomik, Valdrin Lluka, duke arsyetuar privatizimit e Telekomit tha se kjo duhet të ndodhë, duke pasur parasysh të gjitha problemet që janë akumuluar ndër vite dhe se proceset e humbura gjyqësore po rrezikojnë qëndrueshmërinë e Telekomit.

Sipas tij, fillimisht duhet të rikonstruktohet dhe të përmirësohet ndërmarrja dhe vendimi për privatizim është në përputhje me ligjet në fuqi dhe se qëllimi është që 51% të privatizohet, ndërsa 49% të jetë në pronësi të shtetit.

“Këtij procesi privatizues do t’i paraprijë investim, transparencë dhe të ketë kredibilitet për tërë procesin e privatizimit”, tha Lluka.

Ndërsa, deputeti nga radhët i LDK-së, Lutfi Zharku tha se si parti e përkrahin privatizimin e Telekomit, porse nuk mund ta votojnë një vendim të tillë pa e pasur një raport të detajuar se në çfarë forme të privatizohet.

Deputeti i VV-së, Glauk Konjufca pati akuza të shumta ndaj ministrit, Lluka. Sipas tij, ai është duke vepruar në kundërshtim me Kuvendin e Koosvës.

“Kuvendi e ka miratuar një rezolutë në korrik të vitit të kaluar ku theksohet se Telekomi duhet rikonstrukturuar dhe jo të privatizohet. Jeni një zyrtar i Z mobile dhe jo ministër i Kosovës, nuk po e ndërpreni kontratën me Z mobile, aty po bëhet zhvatje 9 deri në 11 milion euro”, tha ai.

Ministri, Lluka në përgjigjen e deputetit të VV-së tha se disa pika të rezolutës së Kuvendit i kanë trajtuar, ndërsa sa i përket akuzave, ai u shpreh se nuk ka pasur asnjë ndikim në punën e tij si ministër.

“Është e vërtetë që kam punuar në Z mobile, kjo nuk ka të bëjë me punën time si ministër, kontrata skadon në qershor, nuk mundet me u shkëput tash”, shtoi ministri Lluka.

Deputeti i PDK-së, Memli Krasniqi tha se gjendja e Telekomit është më e keqe prej që është themeluar dhe për këtë arsye duhet të privatizohet.

Sipas tij, procesi i privatizimit duhet të kishte ndodhur më herët dhe tash do të kishim një Telekom shumë më të suksesshëm.

“Sikur të kishte pasur ky kuvend përgjegjësi politike qytetare, ku proces do të ishte i harruar dhe do të kishim një Telekom shumë më të suksesshëm”, tha Krasniqi.

Më 22 janar, Qeveria e Kosovës i ka dhënë dritën e gjelbër privatizimit të Telekomit pas këtij vendimi. Ndërsa, Bordi i Drejtorëve i Telekomit të Kosovës Sh.A, në mbledhjen e fundit, unanimisht ka vendosur që për pozitën e kryeshefit ekzekutiv të Telekomit të Kosovës të zgjidhet Bedri Istrefi.