Organizata joqeveritare Lobi Euroatlantik Shqiptar me seli në Gjermani i është drejtuar me një letër përfaqësuesit të lartë të BE-së, Josep Borrell, i cili u deklarua për idenë e ndryshimit të kufijve.

Lobi Euroatlantik Shqiptar e ka parë me shumë shqetësim deklaratën e Borrellit, lidhur më siç thonë ata idetë qëllimkëqija që po qarkullojnë që një kohë, për mundësinë e ndryshimit të kufijve, në mes të Kosovës dhe Serbisë. Vlerëson se këto ide nuk janë të zbatueshme, por edhe si deklarata mund të jenë shumë të dëmshme për paqen dhe stabilitetin e rajonit.

“Vetë pavarësia e Kosovës, në kuadër të kufijve aktual është kompromis i yni, ngase trojet e Kosovës kanë qenë deri në qytetin e Nishit (sot qytet i pabanuar nga shqiptarët në Serbi, si pasojë e dëbimit gjenocidial). Shteti serb, përmes projekteve të Akademisë së Shkencave të Serbisë, (të gjitha projektet janë tashmë publike), efektivisht ka punuar për dëbimin e gjithë shqiptarëve nga trojet e tyre etnike. Ata arritën që përmes dhunës dhe represionit të vrasin e dëbojnë miliona shqiptarë, si rrjedhojë, sot ka më shumë shqiptarë që jetojnë në mërgatë sesa në trojet etnike. Shtypja dhe represioni kanë qenë sistematik, ai rikulmoi përsëri në vitet e 90-ta, të shekullit të kaluar dhe ju personalisht e keni parë se çka ishte në gjendje të bëjë regjimi brutal i Sllobodan Millosheviqit, bashkëpunëtorët e të cilit, fatkeqësisht, janë edhe sot në krye të shtetit serb.”, thuhet ndër tjerash në letër.

Në letrën e kësaj organizate drejtuar Borrrellit përmendet edhe gjenocidi serb në Kosovë.

“Kufijtë aktual të Kosovës, janë të shënuar me gjakun e qindra-mijërave shqiptarëve të vrarë padrejtësisht nga Serbia në këto 150 vitet e fundit. Vetëm në vitet në vitin 1998 dhe 1999 u vranë rreth 14.000 persona, midis tyre, 1230 fëmijë, përfshirë edhe foshnje të porsalindura dhe gra shtatzëna. Rreth 20.000 gra u dhunuan dhe fshatra dhe qytete të tërë u dogjën dhe u rrafshuan, përfshirë trashëgiminë e rëndësishme kulturore dhe shpirtërore të popullit tonë. Në përfundim të luftës, fati i më shumë se 6.000 mbeti i pazgjidhur. Edhe sot, më shumë se dy dekada më pas, 1.600 persona vazhdojnë të jetë të zhdukur. Dhe familje të tëra presin në ankth ndonjë lajm për ta.”, thuhet më tej në letër.

Në letrën drejtuar Borrellit u kërkua që BE-ja ta detyrojë Serbinë t’i hapë arkivat dhe ta ndriçojë fatin e të pategjurve, kërkim falje ndaj Kosovës, kompensim për dëmet e luftës dhe dënim për kryerësit e gjenocidit. Në fund u kërkua që BE-ja ta detyrojë Serbinë ta njoh Kosovën në kufijtë aktual.

“Dialogu që ju si BE e ndërmjetësoni, duhet ta detyrojë Serbinë ti hapë arkivat dhe ti ndriçoj fatet e njerëzve tanë, që ende janë të pagjetur. Duhet ta detyroj Serbinë që të kërkoj falje për krimet e bëra, të bëjë kompensimin për dëmet e luftës. Ta kthej fondin e vjedhur të pensioneve dhe depozitave dhe trashëgimisë kulturore që padrejtësisht i mban në Beograd. Ti dënoj vrasësit e dhunuesit, e jo ti shpërblej ata me pozita të larta në qeverinë, ushtrinë dhe policinë e Serbisë. Dhe në fund ta njoh Kosovën në kufijtë aktual, sepse ky është kompromisi ynë i dhimbshëm. Çdo përpjekje për ti tkurrur më tej tokat e Kosovës, do të marrin përgjigje të ashpër dhe mund ta destabilizojnë rënd gjendjen në rajonin tonë.”, thuhet në letrën drejtuar Borrellit./21Media