Kryetari i Kuvendit të Republikës së Kosovës, Glauk Konjufca priti sot në takim Ministrin e Punëve të Jashtme të Republikës së Maqedonisë së Veriut, Bujar Osmanin.

“Gjatë takimit, i cili u karakterizua nga një frymë konstruktive dhe e pajtimit të plotë mbi interesat reciproke të bashkëpunimit në mes të dyja shteteve, u konstatua se Republika e Kosovës dhe ajo e Maqedonisë së Veriut nuk kanë ndonjë çështje kontestuese e që do të mund të bëhej pengesë për ruajtjen dhe thellimin e këtyre raporteve të përbashkëta miqësore.”, u bë e ditur në komunikatën e Kuvendit.

Konjufca shprehu vlerësimin e tij se fati i popujve të rajonit tonë është i përbashkët, prandaj, siç u theksua, të tilla duhet të jenë edhe qëllimet.

“Në këtë kontekst, integrimi i Maqedonisë së Veriut në NATO dhe avancimi drejt BE-së e bën më të sigurt edhe vet Kosovën si aspiruese e këtyre integrimeve”, tha Konjufca, i cili vlerësoi kontributin e liderëve të Maqedonisë Veriore në arritjen e Marrëveshjes së Prespës, e cila u bë një model i mirë për zgjidhjen e mosmarrëveshjeve ndërfqinjësore në rajon dhe një ogur i mirë i rrugës së pashmangshme euro-atlantike për të gjithë.

Ndërsa, ministri Osmani e uroi kryetarin Konjufca për konstituimin e institucioneve të reja në Kosovë, duke besuar se tashmë stabiliteti institucional i Kosovës do të reflektojë edhe në intensifikimin e bashkëpunimit ndërshtetëror.

Po ashtu, siç u theksua, ministri Osmani e konfirmoi mbështetjen e palëkundur të Maqedonisë Veriore në rrugën e integrimit euro-atlantik të Kosovës, duke garantuar se shteti i tij do të vazhdojë përkrahjen ndaj Kosovës edhe në përpjekjet për anëtarësim në organizata ndërkombëtare.

“Më tej, ministri Osmani e informoi kryekuvendarin Konjufca për fillimin e investimeve infrastrukturore që kanë nisur në Maqedoninë Veriore (vazhdimi i autostradës nga Bllaca në Shkup), e të cilat do ta lehtësojnë dhe rrisin volumin e bashkëpunimit ekonomik në mes të dy vendeve.”, u bë e ditur në komunikatë.

Ndërkaq, Konjufca i shprehu ministrit Osmani gatishmërinë dhe nevojën e bashkëpunimit të Kuvendit të Kosovës me Kuvendin e Maqedonisë së Veriut, duke besuar shumë në dobishmërinë që do ta kishte për Kosovën njohja e përvojës së Maqedonisë Veriore në proceset transformuese legjislative drejt rrugës së integrimit evropian, rrugë nëpër të cilën synon të kalojë edhe Republika e Kosovës.​/21Media